Լեռնային Ղարաբաղում Էբոլայի կանխարգելման դեմ միջոցառումներ են իրականացնում

Աշխարհում Էբոլա վիրուսով հարուցված հիվանդությամբ համաճարակային լարված իրավիճակով պայմանավորված ԼՂ Հանրապետություն հիվանդության ներթափանցումը եւ ազգաբնակչության շրջանում տարածումն կանխելու նպատակով առողջապահության նախարար Հարություն Քուշկյանի կողմից հոկտեմբերի 17-ին ստորագրվեց հրաման:

Հրամանի համաձայն տրվել են համապատասխան հանձնարարականներ նախարարության եւ համակարգի, մասնավորապես շտապ բժշակական օգնության, ինֆեկցիոն, համաճարակաբանության եւ հիգիենայի ծառայությունների պատասխանատու անձանց` անհրաժեշտ միջոցառումներ իրականացնելու համար:

ԼՂՀ բնակչության, ինչպես նաեւ Արցախ ժամանողների եւ մեկնողների շրջանում բժշկահիգիենիկ գիտելիքներ տարածելու եւ իրազեկելու նպատակով արդեն պատրաստ են «Էբոլա վարակի վերաբերյալ» եւ «Ի՞նչ է Էբոլա վիրուսը եւ ինչպե՞ս պաշտպանվել նրանից» վերնագրված հուշաթերթերի նմուշները եւ «Էբոլա վիրուսով հարուցված հիվանդության համաճարակաբանության, դեպքերի ստանդարտ բնորոշման, բուժման, կանխարգելման, վարակի հսկողության» մեթոդական ուղեցույցը: Նախատեսվում են նաեւ սեմինար դասընթացներ՝ ինչպես բուժաշխատողների, այնպես էլ զբոսաշրջության գործունեություն իրականացնող կազմակերպությունների աշխատակիցների համար:

Առողջապահության նախարարությունը ավելի սերտ կհամագործակցի գյուղատնտեսության նախարարության հետ՝ վայրի կենդանիների հանրապետություն ներկրման սահմանափակումների առնչությամբ: Ստեփանակերտում եւ շրջաններում կիրականացվեն արագ արձագանքման թիմերի ուսուցողական դասընթացներ: Թիմերը կանխարգելիչ եւ հակահամաճարակային միջոցառումներ իրականացնելու համար ապահովված են անհատական պաշտպանիչ միջոցներով:

Հանրապետության բժշկական կազմակերպություններում առկա են արհեստական շնչառական ապարատների, դեղորայքային (ջերմիջեցնողներ, արյունահոսությունը կանխող պատրաստուկներ), անհատական պաշտպանիչ արտահագուստի պահուստային պաշարներ: ԼՂՀ առողջապահության նախարարության պաշտոնաթերթի եւ էլեկտրոնային կայքի միջոցով մշտապես կտրամադրվեն տեղեկություններ էբոլա վիրուսով հարուցված հիվանդության հիմնական կլինիկական ախտանշանների, վարակվելու ռիսկի, տարածման մեխանիզմների եւ գործոնների, կանխարգելիչ միջոցառումների վերաբերյալ:

Հետևեք NEWS.am Medicine-ին Facebook-ում և Twitter-ում