Որտե՞ղ եւ ու՞մ է պետք դիմել, եթե դեղամիջոցների որակի վերաբերյալ կասկածներ ունեք

Եթե որեւէ դեղամիջոցի որակի վերաբերյալ կասկածներ ունեք, կամ այն օգտագործելու ընթացքում ի հայտ են եկել կողմնակի երեւույթներ, որոնք դեղի ներդիր-թերթիկի մեջ նկարագրված չեն եղել, դա պատճառ չէ ասել, թե իբրեւ «բոլոր դեղերը կեղծ են», եւ ոչինչ չանել: Հայաստանում գործում է մարմին, որին նման դեպքերում պետք է դիմել:

Դեղամիջոցների հետ առաջացած ցանկացած խնդրի դեպքում, մասնավորապես, եթե կան չնկարագրված կողմնակի երեւույթներ կամ դեղի որակի վերաբերյալ կասկածներ, պետք է դիմել ՀՀ ԱՆ Դեղերի եւ բժշկական տեխնոլոգիաների փորձագիտական կենտրոն: Այս մասին մեզ նշված կենտրոնի տնօրենի տեղակալ Լիլիթ Ղազարյանն է պատմել:

Նրա խոսքով՝ առանց համապատասխան հետազոտությունների հնարավոր չէ ստուգել դեղամիջոցի որակը կամ պարզել, թե ինչու է հիվանդի մոտ կոնկրետ դեղի արդյունավետությունը նվազել. Դեղերի եւ բժշկական տեխնոլոգիաների փորձագիտական կենտրոնը կարող է նման հետազտություններ իրականացնել; այն կարող է նաեւ պարզել, արդյոք դեղամիջոցը Հայաստան օրինական ճանապարհով է ներմուծվել: Այդ իսկ պատճառով, մասնագետը խնդրում է, որ ցանկացած բողոք, ցանկացած խնդիր ներկայացվի փորձագիտական կենտրոն: Դա շատ կարեւոր է բոլոր ՀՀ քաղաքացիների համար, քանի որ նման բողոքից հետո անցկացված հետազոտության արդյունքում կարող է հայտնաբերվել եւ շրջանառությունից հանվել, օրինակ, ինչ-որ անորակ դեղամիջոց:

Լիլիթ Ղազարյան նաեւ հիշեցրել է, որ որեւէ դեղ անվտանգ չէ՝ բացարձակ անվտանգ դեղ գոյություն չունի: Իհարկե, ցանկացած դեղ շուկա մտնելուց առաջ մի շարք հետազոտությունների եւ փորձաքննությունների է ենթարկվում, բայց չի բացառվում, որ դրա կիրառման արդյունքում կարող են ի հայտ գալ նոր, մինչեւ դրա գրանցումը չարձանագրված երեւույթներ, որոնց մասին պետք է անպայման տեղեկացնել համապատասխան մարմիններին, տվյալ դեպքում՝ Դեղերի եւ բժշկական տեխնոլոգիաների փորձագիտական կենտրոն:

ՀՀ ԱՆ Դեղերի եւ բժշկական տեխնոլոգիաների փորձագիտական կենտրոնի հեռախոսահամարն է 222-133: Գործում է նաեւ թեժ գիծ՝ 237-265 եւ 773-368 հեռախոսահամարներով:

Բողոքները կարող եք ներկայացնել ինչպես հեռախոսով, այնպես էլ կենտրոնի պաշտոնական կայքի առցանց բողոքի հայտագիրը լրացնելով:

Հետևեք NEWS.am Medicine-ին Facebook-ում և Twitter-ում