Ալկոհոլն ու ծխելը ավելի հավանական են դարձնում տկարամտությունը

Ծխելն ու ալկոհոլային խմիչքները նկատելիորեն ավելի հավանական են դարձնում դեմենցիայի զարգացումը, քանի որ վնասում են ուղեղի որոշ առանցքային հատվածները եւ նվազեցնում են գորշ նյութի քանակը: Այս մասին են հայտնում University of Southern California-ի գիտնականները:

Հետաքրքիր է, որ նմանատիպ էֆեկտ ունեն նաեւ ճարպակալումն ու դիաբետը: Դրանց դեպքում եւս պակասում է գորշ նյութը:

Գիտնականները սկանավորել են 1600 մարդու ուղեղը եւ կապ գտել նրանց կենսակերպի ու ուղեղի կառուցվածքի միջեւ:  Սկզբում նրանք ճշտել են, թե ինչպիսի կենսակերպ ունեին հետազոտության մասնակիցները, իսկ 7 տարի անց սկանավորել են նրանց ուղեղը եւ ինտելեկտը ստուգող թեստեր անցկացրել` նրանց մոտ Ալցհեյմերի հիվանդության ախտանիշները պարզելու համար:

Սկանավորումը ցույց է տվել, որ դիաբետն ու ալկոհոլի օգտագործումը նվազեցնում են ուղեղի ընդհանուր ծավալը, իսկ ծխելն ու ճարպակալումը նվազեցնում են ուղեղի ճակատային մասի ծավալը: Բացի այդ՝ ծխողների ու ալկոհոլը չարաշահողների մոտ ավելի փոքր է լինում հիպոկամպը:

Թեստերը ցույց են տվեցլ, որ ուղեղի ծավալի վերոնշյալ փոփոխություններով մարդիկ կոգնիտիվ գործառույթների ու հիշողության հետ կապված խնդիրներ ունեին: Իսկ բոլոր այս ախտանիշները ավելի ուշ տարիքում վկայում են դեմենցիայի մասին:

Համապատասխան հոդվածը լույս է տեսել Radiology ամսագրում: 

Հետևեք NEWS.am Medicine-ին Facebook-ում և Twitter-ում