Երեւանի բժշկական պարագաների «Մեգա Մեդ» գործարանը բացվել է 2014-ի մարտին, բայց առայժմ չի սկսել արտադրանքի սերիական թողարկումը: Գործարանում սպասում են կորեացի մասնագետների ժամանմանը, որոնք պիտի զբաղվեն արտադրության վերջնական կարգաբերմամբ: Այդ մասին NEWS.am Medicine-ին հաղորդել է գործարանի ներկայացուցիչ Գագիկ Մաթեւոսյանը:
Նրա խոսքով, գործարանի բացմանը մասնագետների առաջին խումբը փորձնական թողարկում է կատարել, ինչից հետո վերջնական կարգաբերման համար անհրաժեշտ էր մասնագետների երկրորդ խմբի ժամանումը: Այդ խմբին սպասում էին 2015-ի հունիսին, բայց Ռուսաստանում ստեղծված իրավիճակի հետեւանքով Երեւանի «Մեգա Մեդ» գործարանի սեփականատեր «Աֆինա Պալադա» ընկերությունը որոշակի դժվարություններ ունի տարադրամային վճարումների հետ կապված եւ չի կարողացել փող փոխանցել կորեացիներին: Այժմ կորեացի մանագետներին սպասում են սեպտեմբերի կեսերին:
Մինչ այդ, Երեւանի գործարանի մասնագետները վերապատրաստում են անցել ռուս ներդրողի՝ Նովոսիբիրսկում գտնվող «Սիբիրյան բուժական տեխնոլոգիաներ» գործարանում, որը պատկանում է «Աֆինա Պալադա» հոլդինգին:
Գործարանի նախագծային հզորությունը ամսական 80-90 միլիոն ներարկիչ է, արյան համար ասեղներով 10 միլիոն սրվակ, ինչպես նաեւ 32 միլիոն ներարկիչ-գրիչ ինսուլինի համար:
Գործարանում սկզբնական շրջանում 130-150 մարդ կաշխատի՝ 1 հերթափոխով, իսկ հետո՝ եւս 100-150՝ երկու լրացուցիչ հերթափոխով (արտադրությունը կազմակերպվելու է 3 հերթափոխով՝ շուրջօրյա): Գործարանի ստեղծման մեջ ներդրվել է 42 միլիոն դոլար:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր