Ձուկը նվազեցնում է տարեց մարդկանց մոտ տկարամտության զարգացումը

Տարեց մարդիկ, ովքեր հաճախ են ձուկ ու ծովամթերք գործածում, ավելի հազվադեպ են բախվում տկարամտության զանազան դրսեւորումների, քան նրանք, ովքեր քիչ ծովամթերք են ուտում, կամ առհասարակ չեն ուտում: Այս մասին է վկայում Չիկագոյի Ռաշ համալսարանի բուժկենտրոնի աշխատակիցների անցկացրած հետազոտությունը:

Հետազոտողներն ուսումնասիրել են՝ 2004-2013 թթ. ժամանակահատվածում մահացած տարեց մարդկանց ուղեղի հյուսվածքների նմուշները: Հետազոտության մասնակիցների միջին տարիքը մահվան պահին մոտավորապես 90 տարեկան էր: Գիտնականները տեղեկացված էին նաեւ այդ մարդկանց սննդակարգի մասին:

Հետազոտությունը ցույց է տվել, որ շաբաթական առնվազն մեկ անգամ ծովամթերք ուտողների ուղեղում ավելի քիչ վահանիկներ կամ նեյրոֆիբրիլյար կծիկներ կան ( որոնք բնորոշ են Ալցհեյմերի հիվանդության զարգացմանը), քան նրանց մոտ ովքեր ավելի հազվադեպ էին ձուկ ուտում կամ առհասարակ չէին ուտում: Հետաքրքիր է, որ ձկան յուղի կամ այն պարունակող սննդային հավելումների գործածումը նույն արդյունքը չէր ապահովում:

Գիտնականները նաեւ նշել են, որ ծովամթերքը օգնել էր APOE գենի տարբերակն ունեցող մարդկանց, որը կապակցված է Ալցհեյմերի հիվանանդության զարգացման բարձր հավանականության հետ:

Հետազոտողները նաեւ ուշադրություն են դարձրել այն հանգամանքին, որ ծովամթերքը մասնակիցների ուղեղում մի քիչ բարձրացրել էր սնդիկի մակարդակը, սակայն դա չէր հանգեցրել ուղեղի պաթոլոգիաների աճին:

Ալցհեյմերի հիվանդության ու տկարամտության այլ տեսակների կանխարգելման նպատակով, ըստ հետազոտողների, անհրաժեշտ է շաբաթվա ընթացքում ծովամթերքից պատրաստված ավելի քան երկու կերակրատեսակ ուտել: Միեւնույն ժամանակ նրանք դժվարանում են ասել, թե հատկապես ո՛ր ծովամթերքը կարող է այդ տեսակետից առավել օգտակար լինել:

Հետազոտության արդյունքները հրապարակել է American Medical Association ամսագիրը:

Հետևեք NEWS.am Medicine-ին Facebook-ում և Twitter-ում