Դաջվածքները կարող են վնասել քրտնագեղձերը. հետազոտություն

Դաջվածքները կարող են վնասել քրտնագեղձերն ու հանգեցնել ջերմակարգավորման հետ կապված խնդիրների՝ զգուշացնում են Հարավային մեթոդիստական համալսարանի մասնագետները, որոնց նոր հետազոտության արդյունքները հրապարակվել են Journal of Applied Physiology ամսագրում:

Հետազոտությունը ցույց է տվել, որ դաջվածքները կարող են նվազեցնել քրտնարտադրության մակարդակը: Դա պոտենցիալ խնդիր է, քանի որ քրտնարտադրությունը օգնում է օրգանիզմին կարգավորել ջերմությունը:

Հետազոտության հեղինակները որոշել են դաջվածքներով 10 կամավորների ձեռքերի վերին եւ ստորին հատվածների վրա քրտնարտադրության մակարդակը՝ առնվազն 5,6 քառակուսի սանտիմետր հատվածը համեմատելով դաջվածքներ չունեցող մաշկի հատվածի հետ:

Հետազոտության ընթացքում կամավորները կրել են խողովակներով հատուկ կոստյում, որոնցով գրեթե կես ժամ տաք  ջուր է շրջանառվել: Դա թույլ է տվել մեծացնել արտաքին ջերմությունն ու չափել քրտնարտադրության մակարդակը: Հատվածների ռեակցիան սկզբում միանման է եղել, սակայն դաջվածքներ չունեցող հատվածները արդյունքում ավելի շատ քրտինք են արտադրել, այսինքն՝ ավելի արդյունավետ են իրականացրել քրտնարտադրությունը:  

Հետևեք NEWS.am Medicine-ին Facebook-ում և Twitter-ում