Վատ տեսողությամբ երեխաների պերիֆերիկ տեսողությունը բարելավում են մանկական տեսախաղերի օգնությամբ ընդամենը 8 ժամ տեւող արտասովոր վարժանքից հետո: Տեսախաղերը ստեղծել են Ռոչեսթերի համալսարանի (University of Rochester) եւ Վանդերբիլթի (Vanderbilt University) համալսարանի մասնագետները:
Նոր հետազոտության հեղինակները ամենազարմանալի եզրահանգումն են համարում այդ վարժանքների արդյունավետության երկարատեւությունը. երեխաների բարելավված տեսողությունը պահպանվել է նույնիսկ այդ վարժանքներից հետո մեկ տարի անց:
«Տեսողության սուր խանգարմամբ երեխաները բավական հաճախ անհամաչափ մեծ ջանքեր են գործադրում ուղիղ իրենց դիմացը տեսնելու համար: Իսկ որպես հետեւանք, նրանք անտեսում են պերիֆերիկ տեսողությունը»,- ասում է Ռոչեսթերի համալսարանի հետազոտող Դուե Թադինը:
Մշակողները մանկական համակարգչային խաղ են ստեղծել, որը մասնակիցներին ստիպում է ուշադրություն դարձնել ամբողջ տեսադաշտին, այլ ոչ թե միայն այն կետերին, որոնց ուղղությամբ նրանց տեսողությունն ավելի թուլացած է: «Արդյունքում տեսողական ընկալման խնդիրներում հաջողվել է հասնել 50 տոկոսով բարելավման», նշել է Թադինը:
Խաղացողները ուշադրությունը տեղաբաշխել եւ կենտրոնացրել են ընդարձակ գոտում. նրանք միաժամանակ ուշադիր հետեւել են անսպասելի հայտնվող շարժվող թիրախներին եւ անտեսել են կողմնակի գրգռիչները:
Տեսախաղը խաղալ են առաջարկել առաջին հերթին ԱՄՆ-ի 24 վատ տեսնող դեռահասների: Նախնական հետազոտությունը ցույց է տվել, որ այս երեխաների մեծամասնության կենտրոնական տեսողության սրությունը վատ էր 20/200-ից, այսինքն՝ այն գործնականում կուրության սահմանում էր: Նրանք նաեւ քիչ էին օգտագործում պերիֆերիկ տեսողությունը:
«Մենք երեխաների «սարքավորումը» լավացրեցինք, քանի որ նրանք օպտիկայի, մկանների եւ ցանցաթաղանթի հետ կապված լուրջ ֆիզիկական խնդիրներ են ունենում, ինչը մենք չենք կարող շտկել: Բայց մենք կարողացանք բարելավել նրանց «ծրագրային ապահովումը»՝ ուղեղին սովորեցնելով վերաբաշխել ուշադրության ռեսուրսները եւ պերիֆերիկ տեսողությունն ավելի լավ օգտագործել»,- ասել է հետազոտության ղեկավար Ջեֆրի Նայքվիսթը:
Փորձարկվողներին երեք խմբի են բաժանել. ստուգիչ խումբը խաղացել է տետրիս հիշեցնող խաղ, երկրորդ խումբը՝ Ratchet & Clank խաղը, երեխաների երրորդ խումբն օգտագործել է հետազոտողների մշակած վարժանքային խաղը: Բոլոր խաղերը ցուցադրվել են մեծ պրոյեկցիոն էկրանին, որպեսզի ավելի լավ ներգործեին տեսողական շրջագծի վրա:
Ընդհանուր առմամբ վարժանքի 8 ժամից հետո երկրորդ եւ երրորդ խմբերի երեխաների մոտ տեսողական զգալի բարելավում է նկատվել:
Երեխաները կարողացել են հեռավոր շրջագծում ավելի լավ ընկալել շարժվող օբյեկտները (շարժման ընկալում): Նրանք նաեւ կարողացել են ավելի լավ հետեւել տեսողական «կուտակվածությանը»՝ որոշակի տառերի որոշումը այլ տառերի դաշտի ներսում: Փորձարկվողները կարողացել են կուտակված տեսարաններում (տեսողական որոնում) ավելի արագ գտնել օբյեկտները:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր