Հղիության ժամանակ ձկան յուղը եւ պրոբիոտիկները նվազեցնում են ապագա երեխայի մոտ ալերգիայի զարգացման հավանականությունը

Եթե ապագա մայրիկը սնունդի մեջ ձկան յուղ կամ պրոբիոտիկներ է օգտագործում, ապա դա կարող է դրական ազդել երեխայի առողջության վրա: Գիտնականներն այսպիսի եզրակացություն են կատարել՝ երեխայի մոտ ալերգիայի կամ էկզեմայի զարգացման հավանականության վրա հղի կնոջ սննդակարգի ազդեցության հետազոտության հիման վրա՝ իրականացված  մեծ մեթաանալիզի շրջանակում, որը ներառել է ավելի քան 400 տարբեր հետազոտություններ եւ 1,5 մլն մարդու տվյալներ:

Այսպես՝ եթե հղի կինն ամեն օր ձկան յուղի պարկուճներ է օգտագործել՝ 20-շաբաթական հղիությունից սկսած եւ կրծքով կերակրելու առաջին 3-4 ամիսներին, ապա երեխայի մոտ ձվի նկատմամբ ալերգիայի զարգացման հավանականությունը 30 տոկոսով  նվազել է: Ավելին՝ ձկան յուղն օգնել է 38 տոկոսով նվազեցնել գետնընկույզի նկատմամբ ալերգիայի առաջացումը: Ճիշտ է, վերջին եզրակացությունը հիմնված է ավելի փոքր թվով տվյալների վրա, նշում են գիտնականները

Ինչ վերաբերում է պրոբիոտիկներին (որոնք հիմնականում պարունակում են Lactobacillus rhamnosus բակտերիաներ), ապա հետազոտությունը ցույց է տվել, որ եթե կինը 36-38-շաբաթական հղիությունից սկսած եւ կրծքով կերակրելու առաջին 3-6 ամիսների ընթացքում ամեն օր պարկուճի ձեւով պրոբիոտիկային հավելում է օգտագործել, ապա երեխայի մոտ էկզեմայի զարգացման հավանականությունը 22 տոկոսով կրճատվել է: «Պաշտպանության» ժամանակահատվածը տեւել է՝ 6 ամսականից սկսած եւ մինչեւ երեք տարեկան:

Հետազոտության մեջ հաշվի են առել պրոբիոտիկների օգտագործումը պարկուճի, փոշու կամ ըմպելիքի ձեւով (յոգուրտների մեծ մասը բավարար քանակությամբ պրոբիոտիկներ չի պարունակում): Հղիության վաղ ժամկետներում պրոբիոտիկներ չեն օգտագործվել:

Ճիշտ է, Լոնդոնի Կայսերական քոլեջի գիտնականները նշում են, որ ցանկացած մեխանիզմ, որը կկարողանար նման հարաբերակցությունը բացատրել, մինչ օրս հայտնի չէ:

Սակայն կա մեկ վերապահություն. ձկան յուղի օգտագործման մասին դրական եզրահանգումները վերաբերում են միայն այն հավելումներին, որոնք Օմեգա-3 պոլիհագեցած ճարպաթթուներ են պարունակել: Իսկ ահա Օմեգա-6 պոլիհագեցած ճարպաթթուները ոչ մի կերպ չեն ազդել երեխայի մոտ ալերգիայի զարգացման հավանականության վրա:

Հետազոտության հեղինակները նշում են, որ բոլոր հետազոտությունները (բացի մեկից) դիտարկել են ձկան յուղը որպես հավելում օգտագործելու դեպքերը, այլ ոչ դրա օգտագործումը: Մասնագետներից շատերը մինչեւ հիմա նախազգուշացնում են հղիության ժամանակահատվածում ձկան չափավոր օգտագործման անհրաժեշտության մասին՝ ձկան շատ տեսակներում հայտնաբերված սնդիկի հետքերի պատճառով:

Գիտնականները նաեւ ոչ մի համոզիչ ապացույց չեն գտել, որ հղիության ժամանակ պոտենցիալ ալերգեն որեւէ մթերքի (կաթնամթերք, ընկուզեղեն կամ ձու) օգտագործումն ինչ-որ կերպ ազդում է երեխայի մոտ ալերգիայի եւ էկզեմայի առաջացման հավանականության վրա:

Վերջնարդյունքում հետազոտության հեղինակները ապագա մայրիկներին խորհուրդ են տալիս 36-շաբաթական հղիությունից սկսած եւ կրծքով կերակրելու առաջին 6 ամիսների ընթացքում ամեն օր պրոբիոտիկային հավելումներ օգտագործել: Իսկ ձկան յուղ անհրաժեշտ է օգտագործել ամեն օր՝ 20-շաբաթական հղիությունից սկսած եւ կրծքով կերակրելու մոտ 4 ամիսներին:

Հետազոտությունը նաեւ ցույց է տվել, որ սննդակարգում մյուս «միջամտությունները» ոչ մի կերպ կապված չեն երեխայի մոտ ալերգիայի կամ աուտոիմունային հիվանդությունների զարգացման մեծ հավանականության հետ: Այսպես՝ ամփոփման մեջ է մտել ժամկետների հետազոտումը, երբ երեխան սկսում է կոշտ կերակուր օգտագործել, եւ բազմաթիվ վիտամինների, հանքանյութերի, մրգերի կամ բանջարեղենի օգտագործումը:

Հետազոտության արդյունքները ներկայացվել են PLOS Medicine գիտական ամսագրում:

Հետևեք NEWS.am Medicine-ին Facebook-ում և Twitter-ում