Հակաբիոտիկները բարձրացնում են աղիների բորբոքման հավանականությունը

Հակաբիոտիկների հաճախակի օգտագործումը կարող է աղիների բորբոքային հիվանդություններ (ԱԲՀ) եւ խոցային կոլիտ առաջացնել։ Սա հատկապես վերաբերում է 40-ից բարձր տարիքի մարդկանց։ Այդ հիվանդությունների թվի աճ վերջին տարիներին նկատվում է ամբողջ աշխարհում, տեղեկացրել է The Health Site-ը։

Գիտնականներն ուսումնասիրել են Դանիայի քաղաքացիների բժշկական տվյալները, որոնք հավաքվել են 2000-2018թթ.։ Դիտարկվել են 10 եւ ավելի մեծ տարիքի ավելի քան 6,1 մլն մարդու տվյալներ։ Մասնագետներին հետաքրքրում էր, թե ինչպես են հակաբիոտիկներն ազդում ԱԲՀ-ի առաջացման վրա։

Վերլուծությունը ցույց է տվել, որ հետազոտվողների 91 տոկոսն ուսումնասիրվող ժամանակամիջոցում գոնե մեկ անգամ հակաբիոտիկներով բուժում է ստացել։ Նրանց  շրջանում ախտորոշվել է խոցային կոլիտի մոտ 36 017 եւ Կրոնի հիվանդության 16 881 նոր դեպք։

Հետազոտության հեղինակները եկել են այն եզրահանգման, որ հակաբիոտիկների օգտագոծումը մեծացնում է աղեստամոքսային ախտահարումների եւ ԱԲՀ-ների առաջացման հավանականությունը, եւ տարիքի հետ այդ օրինաչափությունն ավելի էական է դառնում։

«10-40 տարեկան մարդկանց մոտ, որոնք հակաբիոտիկներ են ընդունել, ԱԲՀ-ի ախտորոշման հավանականությունը բարձր է եղել 28 տոկոսով։ 40-60 տարեկանների մոտ այդ հավանականությունը մեծ է եղել 48, 60-ից բարձր տարիքի անձանց մոտ՝ 47 տոկոսով»։

Մասնագետների կարծիքով՝ աղիների բորբոքային հիվանդությունների առաջացման հարցում կարեւոր դեր են խաղում աննպաստ փոփոխություններն աղիների միկրոբիոմում, որոնք տեղի են ունենում հակաբիոտիկների ազդեցության տակ։

Հետևեք NEWS.am Medicine-ին Facebook-ում և Twitter-ում