Հայաստանում սիրտ-անոթային հիվանդությունների ռիսկի գործոններից առաջին տեղում, միանշանակ, ծխելն է: Այս մասին հոկտեմբերի 10-ին լրագրողների հետ զրույցում տեղեկացրեց սրտաբան Մարինե Օրդյանը:
Նրա խոսքով՝ ամբողջ աշխարհում մահացության առաջին պատճառ հանդիսացող այս հիվանդության ռիսկի գործոնների թվարկումը բոլոր երկրներում միանման է, սակայն կախված երկրից՝ գործոնները կարող են փոխել տեղերը: Եթե, ասենք, ԱՄՆ-ում այդ ցուցակի առաջին տեղում կարելի է նշել ճարպակալումը, ապա Հայաստանում դա, միանշանակ, ծխելն է:
Ըստ մասնագետի, ռիսկի մյուս լրջագույն գործոններն են. նստակյաց կենսակերպը, անառողջ սնունդը, շաքարի մակարդակի անվերահսկելիությունը, խոլեստերինի մակարդակը, ալկոհոլի չարաշահումը:
Մարինե Օրդյանը նաեւ մի քանի թիվ նշեց. ամբողջ աշխարհում մահացության պատճառների շարքում սիրտ-անոթային հիվանդությունների մասնաբաժինը 30% է: Մահացությունների այս խմբում հիմնական պատճառները սրտի եւ ուղեղի կաթվածն են, ընդ որում, դրանք հավասարապես խլում են ե՛ւ կանանց, ե՛ւ տղամարդկանց կյանքը: Եթե սիրտ-անոթային հիվանդություններից մահացությունը դիտարկենք ըստ երկրների, ապա միջին եւ ցածր եկամուտ ունեցող բնակչությամբ երկրներն այս ցուցանիշով զգալիորեն գերազանցում են զարգացած պետություններին:
Եվս մեկ համաշխարհային միտում է այս հիվանդությունների երիտասարդացումը: Եթե 20 տարի առաջ 35 տարեկան մարդու մոտ սրտի կաթվածն արտասովոր երեւույթ էր, ապա այսօր տարիքային այդ շեմը նվազել է մինչեւ 28-30 տարեկանի:
Սիրտ-անոթային հիվանդությունների պրոֆիլակտիկայի շուրջ խորհուրդներն ավանդական են. առողջ ապրելակերպ (ներառյալ ֆիզիկական ակտիվությունը, առողջ սնունդը եւ վնասակար սովորույթներից հրաժարվելը), ինչպես նաեւ ավելի շատ դրական զգացողություններ ու պակաս սթրես:
«Սրտաբաններն ասում են, որ ամենակարեւորը դրական էմոցիաներն են: Հարկավոր է ներել մերձավորին եւ չկենտրոնանալ կենցաղային խնդիրների վրա, քանի որ դրանք լուծվում են, իսկ սիրտ-անոթային հիվանդությունները՝ մնում»,- ասաց սրտաբանը:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր