3 պատճառ՝ հենց հիմա ձեռքերը լվանալու համար

NEWS.am Medicine-ի խմբագրությունը ընթերցողի ուշադրությանն է ներկայացնում 3 պատճառ առ այն, թե ինչու հենց հիմա ձեռքերը լվանալու պետք է գնալ: Եվ, իհարկե, ոչ միայն հիմա, այլ՝ պարբերաբար:

1. Կեղտոտ ձեռքերի միջոցով բազմաթիվ վիրուսային հիվանդութուններ են փոխանցվում

Բավական է՝ ձեռքով այնպիսի մակերեսի հպվեք, որի վրա վիրուսակիր է փռշտացել, իսկ հետո էլ՝ քթին, շուրթերին եւ նույնիսկ այտերին դիպչեք, եւ գրիպի վիրուսն արդեն կարող է Ձեր օրգանիզմում հայտնվել: Այո, գրիպն ամենաահարկու հիվանդությունը չէ, բայց ճիշտ նույն եղանակով էլ անհամեմատ ավելի վատ հիվանդություններ կարող եք ձեռք բերել: Հեպատիտ А կամ Е, օրինակ: Ի միջի այլոց, Էբոլա տենդով վարակված իսպանացի բուժքույրը, ամենայն հավանականությամբ, կեղտոտ ձեռնոցով դեմքին դիպչելու արդյունքում է մահացու վտանգավոր հիվանդությունը «ձեռք գցել»:

Ուստի եւ մասնագետները խորհուրդ են տալիս ձեռքերը հնարավորինս հաճախ լվանալ, հատկապես երբ ոչ այնքան մաքուր մակերեսների եւ ընդանուր օգտագործման իրերի եք հպվել:

2. Կեղտոտ ձեռքերի միջոցով մարսողական համակարգի ինֆեկցիաներ են փոխանցվում

Մարսողական համակարգի ինֆեկցիաների մեծ մասը հենց կեղտոտ ձեռքերի միջոցով են օրգանիզմ անցնում: Կեղտոտ բանի եք հպվել, հետո՝ նույն այդ ձեռքերով ինչ-որ բան կերել, եւ վերջ, պատրաստ է: Վիրուսները եւ մանրէներն մարսողական համակարգ են անցել, որտեղ կարող են, բուռն գործունեության արդյունքում, օրական 5 հազար երեխաների մահվան հանգեցնող թունավորում կամ փորլուծություն հրահրել:

3. Վիրուսներն ու մանրէներն ամենուր են

Վտանգավոր վիրուսներ եւ մանրէներ ամեն տեղ կարող են լինել. Ձեր իսկ բջջային հեռախոսի, համակարգչի ստեղնաշարի եւ մկնիկի, հեռուստացույցի հեռակառավարման վահանակի վրա, դռան բռնակներին կարելի է անարգել բազմացող հազարավոր, ինչու չէ՝ նաեւ տասնյակ հազարավոր միկրոօրգանիզմներ գտնել, որոնք, օրգանիզմ անցնելու պարագայում լուրջ վնաս հասցնելու սպառնալիք են ներկայացնում: Իսկ թե թղթադրամների վրա ինչպիսի մինի-հրեշներ կարող են լինել՝ նույնիսկ հիշեցնելու կարիք չկա:

Իհարկե, NEWS.am Medicine-ը խորհուրդ չի տալիս, օբսեսիվ-կոմպուլսիվ խանգարումներ ունեցող մարդկանց նմանությամբ, ակնթարթը մեկ ձեռքերը լվանալու գնալ: Այդուհանդերձ, արժե անձնական հիգիենային պատշաճ ուշադրություն դարձնել, տուն կամ աշխատավայր վերադառնալուց հետո, ինչպես նաեւ սնվելուց առաջ ձեռքերը լվանալ եւ կեղտոտ ձեռքերով դեմքին չդիպչել:

Հետևեք NEWS.am Medicine-ին Facebook-ում և Twitter-ում