Հայաստան է ներկրվել գրիպի դեմ պատվաստանյութ: Այս մասին լրագրողներին ԱՆ հիվանդությունների վերահսկման եւ կանխարգելման ազգային կենտրոնի օդակաթիլային վարակների եւ հատուկ վտանգավոր վարակիչ հիվանդությունների համաճարակաբանության բաժնի պետ Լիանա Թորոսյանն է հայտնել:
Ինչպես նա պատմել է NEWS.am Medicine-ի թղթակցին, ներկրվող պատվաստանյութը A, H1 (պանդեմիկ եւ սեզոնային), H3 եւ B տեսակների վիրուսների դեմ 6-12 ամսվա ընթացքում կայուն իմունիտետ է ապահովում:
Պատվաստանյութը պատրաստվում է ԱՀԿ-ի ռեֆերենս լաբորատորիաներում, որտեղ հետազոտությունների արդյունքում անջատվում են վիրուսները, հետո բերվում են մեկ ընդհանուր լաբորատորիա, այնտեղ ընտրվում են հաջորդ սեզոնի թեկնածուները եւ ընդգրկվում են եկող սեզոնի պատվաստանյութի կազմի մեջ:
Լիանա Թորոսյանի խոսքով՝ յուրաքանչյուր տարածաշրջանի համար ԱՀԿ-ն յուրովի փունջ է առաջարկում՝ տվյալ տարածաշրջանում առավել մեծ տարածում ունեցող վիրուսների դեմ:
ՀՀ ԱՆ Հիվանդությունների վերահսկման եւ կանխարգելման ազգային կենտրոնի տնօրեն Արտավազդ Վանյանը նշել է, որ զանգվածային պատվաստումներ երկրում նախատեսված չեն, սակայն ցանկության դեպքում յուրաքանչյուր քաղաքացի կարող է դիմել իր տեղամասային պոլիկլինիկա եւ անվճար պատվաստվել:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր