Երեխաներն անում են ամեն հնարավորը ցերեկային քնից խուսափելու համար, իսկ մեծերը սովորաբար երազում են դրա մասին: Վնասակա՞ր է արդյոք ցերեկային քունը: Այս մասին պատմում է բժիշկ Մաննի Ալվարեզը Foxnews.com –ից:
Մարդու կենսաբանական ժամը ստիպում է նրան քնկոտություն զգալ կեսօրին մոտ, իսկ ահա քնելու ցանկությունը հատկապես ուժեղ է առավոտյան ժամը 3-ից 5-ը: Բժիշկների խոսքով՝ ինչքան երկար մարդը արթուն մնա, այդքան լավ նա կքնի գիշերը: Հավանաբար, դա կապված է այն երեւույթի հետ, որ արթուն մնալու ամեն ժամի հետ ուղեղում նեյրոտրանսմիտտեր է արտադրվում, որը հայտնի է ադենոզին անվանումով: Գիշերվա ժամերին այն նպաստում է ավելի խոր քնին: Եթե մարդը ցերեկն է քնում, ուղեղն ազատվում է կուտակված ադենոզինից, ինչից հետո քուն մտնելը, իհարկե, դժվարանում է:
Մյուս կողմից՝ ցերեկային քունը իր առավելություններն ունի: Ինչպես ցույց են տվել հետազոտությունները, ցերեկը քնող մարդիկ 20 տոկոսով ավելի լավ են հիշողւոթյան հետ կապված վարժություններ կատարում, քան նրանք, ովքեր այդ ընթացքում քնած չեն եղել: Դա կապված է այն երեւույթի հետ, որ հիշողությունը հեռացնում է ավելորդ ինֆորմացիան հիպոկամպից՝ կարճատեւ հիշողության համար պատասխանատու ուղեղի հատվածից՝ նոր ինֆորմացիայի համար տեղ ազատելով:
Սակայն երկարատեւ ցերեկային քունը մարդուն քնկոտ է դարձնում օրվա ընթացքում, այդ պատճառով մասնագետները խորհուրդ են տալիս 20 րոպեից ավել չքնել ցերեկը:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր