Ամեն տարի հոկտեմբերի 12-ին Հայաստանում նշում են ծխելու դեմ պայքարի օրը, որ հայտնի է «Ծխախոտի դեմ պայքարի ազգային օր» անունով։
Հայաստանի ՀԿ-ների նախաձեռնությամբ եւ առողջապահության նախարարության ներկայացմամբ 2008 թվականի դեկտեմբերի 18-ին Կառավարությունը որոշում ընդունեց, որոն հոկտեմբերի 12-ը նշվում է որպես «Ծխախոտի դեմ պայքարի ազգային օր»:
Այդպիսով Հայաստանը միացել է Առողջապահության համաշխարհային կազմակերպության «Ծխախոտի դեմ պայքարի մասին» շրջանակային կոնվենցիային, որը նպատակ ունի ներկա եւ ապագա սերունդներին պաշտպանել մարդկանց առողջության համար ծխախոտի օգտագործման եւ ծխախոտի ծխի ազդեցության քայքայիչ հետեւանքներից:
Առողջապահության նախարար Արմեն Մուրադյանը Ամերիկյան համալսարանում դասախոսության ընթացքում հայտնել է, որ Հայաստանում ծխում է ամեն 2 տղամարդկանցից մեկը, ուստի ծխելը առողջապահության ոլորտի լրջագույն խնդիրներից է։
Այն, որ ծխելը կապված է քաղցկեղի եւ թոքերի բազում այլ հիվանդությունների առաջացման հետ, լսել են, թերեւս, բոլորը։ Սակայն նոր հետազոտություններն այդ սովորությունը կապել են նաեւ մի շարք այլ հիվանդությունների առաջացման հետ։
• Թոքերի քրոնիկ օբստրուկտիվ հիվանդությունն ու բրոնխիալ ասթման Հայաստանում թոքերի հիվանդությունների առաջատարներն են, ինչպես պնդում է Հայաստանի գլխավոր թոքաբանը։ Երկու հիվանդությունների զարգացումն էլ կապված է ծխելու հետ, ընդ որում բրոնխիալ ասթման երեխաների մոտ սովորաբար զարգանում է ծնողների ծխելու պատճառով։
• Ծխելն ու ալկոհոլային խմիչքները նկատելիորեն ավելի հավանական են դարձնում դեմենցիայի զարգացումը, ավելի հավանական է դարձնում հոգեկան խանգարումների հավանականությունը։
• MedUni Vienna-ի եւ Basle University Hospital-ի գիտնականները պնդում են, որ ծխելու եւ շագանակագեղձի քաղցկեղի միջեւ միանշանակ կապ գոյություն ունի։
• Ծխելը նաեւ ազդում է արտաքին տեսքի վրա, կործանարար ազդում ոչ միայն ատամների, այլեւ մաշկի վրա, նպաստում նճիռների վաղ ի հայտ գալուն եւ վատթարացնում է ակնե ունեցող մաշկի վիճակը։
• Ծխելն ազդում է վերարտադրողական, բայց նաեւ՝ սեռական գործառույթների վրա, հատկապես՝ տղամարդկանց։
• Պասիվ ծխելը 30 տոկոսով ավելի հավական է դարձնում ինսուլտը, իսկ այսպես կոչված «սոցիալական ծխելը» երեք անգամ ավելի հավանական է դարձնում սրտի հիվանդությունները:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր