Սնվելիս ընտանիքի բոլոր անդամների մասնակցությունը երեխաների համար առողջ սննդակարգի իմաստն ընկալելու, հաղորդակցվելու եւ սեղանի շուրջ վարվելակարգին ծանոթանալու հրաշալի հնարավորություն է ընձեռում: Ընդ որում, որքան շուտ գործի անցնեք՝ այնքան լավ:
Ստորեւ 5 խորհուրդներ ենք ներկայացնում՝ երեխաներին սննդառության վարվելակարգ սովորեցնելու մասին.
1. Բոլորը միասին պետք է նստեն
Նույնիսկ եթե ընտանիքի ամենափոքրիկ անդամը չի կարող սեղանից սնվել կամ չի ցանկանում որեւէ բան ուտել, պնդեք, որ նա էլ ընթրիքին՝ սեղանի շուրջ ներկա լինի: Երկու օրինակ այն մասին, թե ինչպես կարող եք առավելագույն դաստիարակություն ապահովել.
• Օրինակ ծառայեք. երեխաները պետք է տեսնեն, որ բազմատեսակ ուտեստներ եք փորձում: Ինքներդ կերեք այն, ինչ ցանկանում եք, որ երեխան էլ փորձի: Բացի այդ, օրինակելի սոցիալական վարքագիծ դրսեւորեք. փոքրիկն ուշադրություն կդարձնի, թե ինչպես եք հարցերին պատասխանում եւ ինչպես չեք խանգարում՝ մյուսներին խոսել:
• Ընթրիքի տեւողությունը սահմանափակեք. սնվելու գործընթացը կես ժամից ավել չպետք է տեւի: Եթե կարիք կա՝ կարող եք թայմեր կիրառել՝ ժամանակը ճիշտ օգտագործելու համար:
2. Թույլ տվեք՝ յուրաքանչյուրն ուտեստի իր ընտրությունն անի
Եթե երեխան որեւէ ուտեստ կիսատ է թողնում եւ այլընտրանք փնտրում՝ մի փորձեք խանգարել: Առավելագույն արդյունքի հասնելու համար՝
• Երկու «համտեսի» քաղաքականությունը վարեք. խրախուսեք, որ ամեն ինչից երկու անգամ բերանը տանի: Դրանից հետո ընտրությունն իրենն է՝ կարող է թողնել կամ շարունակել: Օրվա ընթացքում այսպիսի ռեժիմով սննդակարգը երեխայի օրգանիզմի համար անհրաժեշտ բոլոր սնուցիչների առկայությունը կապահովի:
• Երբեք մի մոռացեք, որ փոքրիկին փոքր ծավալով սնունդ է հարկավոր: Օրինակ՝ յուրաքանչյուրի՝ թե մեծահասակ մարդու, եւ թե երեխայի համար, իր իսկ ձեռքի ափի չափով միսը բավարար է համարվում:
3. Անհաջողության մատնվելիս մի հուսահատվեք
Երեխան որոշ դեպքերում ուտեստի նոր տեսակը պետք 10 - 20 անգամ տեսնի՝ համտես անելու համարձակություն ձեռք բերելու համար: Ու եւս 10-20 համտեսից հետո միայն կարող է գտնել, որ այն դուր է գալիս իրեն:
Այնպես որ, եթե փոքրիկը հրաժարվում է ինչ-որ բան ուտել, մի քանի շաբաթ անց նորից առաջարկեք:
Բացի այդ, երբեմն թույլ տվեք՝ երեխաները որոշեն, թե ընթրիքին ինչ բանջարեղեն է մատուցվելու: Որոշման համար հպարտության զգացումը կերակրատեսակը փորձելու ցանկություն կարող է առաջացնել: Մանավանդ, եթե ինքն է պատրաստել:
4. Մի ստիպեք, որ, նախքան աղանդերին անցնելը, ափսեի ողջ պարունակությունը ուտեն
Որոշ ծնողներ հենց այսպիսի խրախուսական միջոցառումներ են ձեռնարկում, ինչը ցանկալի չէ: Մի քանի փորձ, այնուամենայնիվ, չի խանգարի:
5. Մի արգելեք
Ծնողներից ոմանք այս կամ այն սիրելի ուտեստը հանում են երեխային սննդակարգից՝ կարծելով, թե փոքրիկը չարաշահում է այն: Սակայն «արգելված» ուտեստը միշտ էլ քաշում է երեխային եւ հնարավորության դեպքում սիրելիքի ուտելիքից անհամեմատ շատ օգտվելու խթան ծառայում:
Փոխարենը՝ կարելի է աննկատ նվազեցնել դրանց չափաբաժինը եւ նմանատիպ, սակայն առավել առողջարար ուտեստներ առաջարկել:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր