Ներարգանդային զարգացման շրջանում եւ երեխաների կյանքի առաջին տարիներին В12 վիտամինի պակասը վատթարացնում է նրանց մտավոր ընդունակությունները: Այս խնդիրը հիմնականում վերաբերում է աղքատ երկրների երեխաներին, առավել բարեկեցիկ երկրներից ռիսկի խմբի մեջ են մտնում վեգանների երեխաները: Այս մասին American Journal of Clinical Nutrition ամսագրում հայտնել են Նորվեգիայի Բերգենի Uni Research հետազոտական կենտրոնի գիտնականները:
Գիտնականները Նեպալից 500 նորածինների արյան նմուշներ են վերցրել եւ պարզել արյան մեջ В12 վիտամինի պարունակության մակարդակը: 5 տարի հետո նրանք հանդիպել են այս երեխաներից 320-ի հետ եւ տարատեսակ թեստերով ստուգել նրանց մտավոր ընդունակությունները:
Հետազոտությանը մասնակցած երեխաների մեծ մասը В12 վիտամինի սուր պակաս չի զգացել, բայց օրգանիզմում դրա պարունակությունը նորմալ աճի եւ զարգացման անհրաժեշտ մակարդակից ցածր է եղել:
Պարզվել է, որ В12 վիտամինի պակասով երեխաները դժվարանում են տառերը ճանաչելիս եւ հասակակիցների զգացմունքները մեկնաբանելիս, նրանք դժվար են հաղթահարում նաեւ գլուխկոտրուկները:
«Մեր արդյունքներն ակնհայտ ցուցադրում են վաղ տարիքում В12 վիտամինի պակասի եւ զարգացման խնդիրների միջեւ կապը, օրինակ՝ բարդ երկրաչափական պատկերների հետ աշխատանքը կամ մյուս երեխաների զգացմունքները հասկանալը»,- ասել է հետազոտության հեղինակ Ինգրիդ Քվեսթադը:
В12, D վիտամինները, երկաթը, ցինկը եւ կալցիումը նորածինների համար առանցքային սնուցող նյութեր են: В12 վիտամինի պակասը կարող է շատ խնդիրներ առաջացնել: Օրինակ՝ այս վիտամինն անհրաժեշտ է արյան կարմիր մարմինների արտադրման համար, որի պակասը կարող է սակավարյունություն առաջացնել:
Ներկայումս հետազոտության արդյունքները ստուգվում են ռանդոմիզացված կլինիկական փորձերով:
В12 վիտամինի պակասը աղքատ երկրներում տարածված երեւույթ է: Ավելի վաղ կատարված հետազոտությունները քանիցս ցույց են տվել ուղեղի զարգացման համար դրա անհրաժեշտությունը: Փորձագետները նշում են, որ В12 վիտամինի պակասը վատթարացնում եւ նույնիսկ դանդաղեցնում է մանկահասակ երեխաների ուղեղի զարգացումը: Քվեսթադը նշել է, որ փոքրիկների սննդակարգում В12-ի պարունակության շտկումը կարող է լինել առավելագույն առողջ զարգացման ապահովման միջոցառումներից մեկը:
В12 վիտամինի պակասի խնդիրն առաջանում է դեռեւս ներարգանդային զարգացման ընթացքում: В12-ը պարունակվում է հիմնականում մսի, կաթնամթերքների եւ ձվի մեջ, որոնք աղքատ երկներում հաճախ դժվար հասանելի են:
Իսկ զարգացած երկրներում ռիսկի խմբի մեջ են մտնում վեգանների երեխաները, որոնք բուսակերության ավելի խիստ ձեւերի կողմնակիցներն են եւ ամբողջությամբ բացառում են կենդանական ծագմամբ սնունդի օգտագործումը:
В12-ի պակասը կարող է նաեւ վաղաժամ ծնունդների պատճառ դառնալ. վիտամինի պակասի դեպքում անհաս երեխա ծննդաբերելու հավանականությունը 21 տոկոսով աճում է:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր