Ավելորդ քաշի համար ամենեւին էլ ժառանգականությունը չէ «մեղավոր», այլ կենսակերպը՝ սնունդը, պնդում են King's College London-ի գիտնականները:
Նրանց խոսքով՝ պրոցեսների գրեթե երկու երրորդը, որոնք բերում են ավելորդ քաշ հավաքելուն, վերահսկվում են սննդակարգով, եւ միայն մեկ հինգերորդ մասն է բաժին ընկնում ժառանգական գործոններին: Այս պատճառով չարժի վկայակոչել «վատ գենետիկան». եթե մարդն ավելորդ քաշ ունի, նա ավելի շուտ սխալ է սնվում:
Գիտնականներն ուսումնասիրել են, թե աղեստամոքսային ուղիում տարբեր սննդամթերքների ազդեցությամբ քիմիական ինչ ռեակցիաներ են տեղի ունենում, եւ անալիզի են ենթարկել 500 երկվորյակների կղանքի նմուշները: Սա թույլ է տվել բացառել գենետիկ բաղադրիչը՝ կենտրոնանալով սնունդի ազդեցությամբ աղիների միկրոֆլորայի փոփոխությունների վրա:
Մասնագետներն առանձնացրել են ճարպակալման բիոմարկերները, որոնք իրանի շրջանում ճարպային շերտերի կուտակման են բերում: Իսկ այս տիպի ճարպակալումը համարվում է ամենավտանգավորը, քանի որ մեծացնում է 2-րդ տիպի դիաբետի եւ սրտաբանական հիվանդությունների առաջացման վտանգը:
Պարզվել է, որ ճարպի պաշարումը վերահսկող աղեստամոքսային ուղիի պրոցեսների 17,9 տոկոսը պայմանավորված է ժառանգական գործոններով: Ակտիվության 67,7 տոկոսը վերահսկվում է օրգանիզմի ստացած սնունդով եւ ըմպելիքներով: Սա նշանակում է, որ մարդկանց մեծամասնությունը կարող է իրապես քաշը վերահսկել սննդակարգի եւ կենսակերպի հաշվին:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր