Գիտնականները արգանդում ներպատվաստելի սաղմերի զտման նոր եղանակ են հայտնաբերել

Անպտղության բուժմամբ զբաղվող գիտնականները ներպատվաստելի սաղմերի զտման նոր եղանակ են հայտնաբերել, ինչի արդյունքում արտաարգանդային բեղմնավորման տեխնոլոգիայի արդյունավետության 50 տոկոսի չափով աճ կարող է գրանցվել, տեղեկացնում է Daily Mail-ը:

Օքսֆորդի համալսարանի գիտահետազոտական խմբի անդամները պարզել են, որ սաղմի էներգիա արտադրող բջիջներում ԴՆԹ-ի բարձր մակարդակի առկայությունը կարող է ներպատվաստման եւ հղիության խափանման ազդակ համարվել:

Գիտնականներին, մասնավորապես, հաջողվել է ԴՆԹ-ի մակարդակի՝ ներպատվաստման համար անվտանգ շեմը գտնել:

Ամեն տարի Մեծ Բրիտանիայում արտաարգանդային բեմնավորման եւ ներպատվաստման շուրջ 60 հազար փորձ է իրականացվում, սակայն զույգերի 70-80 տոկոսը շարունակում են առանց երեխայի մնալ, քանի որ, երբ նույնիսկ առողջ թվացող սաղմը գենետիկ արատներ է պարունակում, հետագա հղիությունը, որպես կանոն, խափանվում է: 

Նոր բացահայտումը ներպատվաստման խափանման երեք դեպքերից մեկը կանխատեսելու հնարավորություն է ընձեռում: Ասել է թե՝ արտաարգանդային բեղմնավորման օգնությանը դիմած զույգերի շուրջ 40 տոկոսն այսուհետ կարող են ծնող դառնալու հաճույքը վայելել:

Գենետիկ հետազոտությունը երկար ժամանակ չի պահանջում: Այն առավելագույնը մի քան ժամ կարող է տեւել եւ մեծ արժեք չի ունենա՝ ընդամենի մի քանի ֆունտ ստեռլինգ:

Օքսֆորդի գիտահետազոտական խմբի անդամները փորձել են պարզել, թե արդյոք արտաարգանդային բեղմնավորմամբ ստացված սաղմում առկա՝ կնոջ կողմից փոխանցվող միտոխոնդրիալ ԴՆԹ-ի քանակը կարող է ներպատվաստման արդյունավետության վրա ազդել:

Միջազգային փորձագետներից բաղկացած խումբը բեղմնավորմանը հաջորդող հինգ օրերի ընթացքում՝ նախքան միտոխոնդրիալ ԴՆԹ-ի մակարդակի աճի մեկնարկը, նմուշներ է վերցրել 392 սաղմերից՝ դրանց հետագա զարգացումն ուսումնասիրելու համար: 

Հետազոտությանը միջինը 38 տարեկան 87 կին է մասնակցել, որոնցից 44-ի դեպքում ներպատվաստումը բնականոն հղիությամբ է ավարտվել, իսկ 43 դեպքերում՝ խափանմամբ:

Գիտնականները պարզել են, որ գենետիկ արատներ կրող եւ մեծ ՝ հատկապես 40-ից բարձր տարիքի կնոջ ձվաբջջից բեղմնավորված սաղմերը մեծ ի մասամբ միտոխոնդրիալ ԴՆԹ-ի բարձր մակարդակ են պարունակում: Իսկ ահա այն սաղմերի մոտ, որոնք հաջողությամբ են ներպատվաստման ենթարկվում, ԴՆԹ-ի մակարդակը նշանակալիորեն ցածր է:

Կարեւորագույն նշանակություն ունի այն հանգամանքը, որ գիտնականներին հաջողվել է ԴՆԹ-ի մակարդակի անվտանգ շեմը գտնել: Պահանջվող առավելագույնից ցածր ցուցանիշ ունեցող բոլոր առողջ սաղմերի ներպաստվաստման փուլը հաջողությամբ է պսակվել:

Հետազոտության հեղինակ դոկտոր Ֆրագուլիի խոսքով, դեռեւս միանշանակ պարզ չէ, թե ինչպես է ԴՆԹ-ի մակարդակը ներպատվաստման արդյունավետության վրա ազդում, սակայն վարկած կա, որ պատճառը սթրեսի ցածր եւ բարձր մակարդակներն են:

Հետևեք NEWS.am Medicine-ին Facebook-ում և Twitter-ում