Ճիշտ գիտելիքների կարեւորությունը. ինչու՞ էր կինը վախենում սեռական ակտից

Սեռականության մասին Ճիշտ եւ գրագետ գիտելիքները չափազանց կարեւոր են հետագա սեռական կյանքի համար: Այս մասին միշտ բժիշկ-սեքսապաթոլոգներ են խոսում, եւ նույնն է վկայում այն պատմությունը, որ լրագրողներին սեքսապաթոլոգ Սեւադա Հակոբյանն է ներկայացրել:

Մի օր մասնագետի մոտ ամուսնական զույգ էր այցի եկել՝ բավականին տարածված խնդրով. կինը վախենում էր սեռական հարաբերություններից եւ ուժեղ ցավային համախտանիշ ուներ, որի պատճառով սեռական ակտն անհնար էր դառնում: Իրականում կնոջ մոտ ցավ չկար՝ ուղղակի սուբյեկտիվ զգացողություն էր, այսինքն, նրան թվում էր, թե ցավ է զգում, սակայն դա միեւնույն է՝ խանգարում էր զույգի ամուսնական կյանքին:

Որտեղի՞ց էր առաջացել այդ վախը եւ ինչու՞ էր կինը համոզված, որ ցավ է զգում:

Պարզվել էր՝ կնոջ բարեկամուհիներից մեկը, ով մի քանի տարվա ամուսնական կյանքի փորձ ուներ, զրույցի ժամանակ պատմել էր, թե տարիներ շարունակ սեռական հարաբերությունների ժամանակ սարսափելի ցավեր է ունենում, որոնց դեմ պայքարելն անհնար է: Խոսակցությունը խորը տպավորություն էր թողել աղջկա վրա. սկսել էր մտածել, թե սեռական ակտը շատ ցավոտ բան է, եւ, բնականաբար, նրա մեջ ուժեղ վախ էր առաջացել:

Սեւադա Հակոբյանի խոսքով, նման դեպքերում սեքսապաթոլոգը բավականին դժվար խնդրի առաջ է կանգնում՝ պայքարել հիվանդի՝ դեռահաս տարիքում ստացած սխալ տեղեկատվության դեմ եւ նոր՝ ճիշտ կարծրատիպեր ստեղծել, որոնց օգնությամբ սեռական կյանքը առողջ ու նորմալ ընթացք ստանալու հնարավորություն կունենա:

Քանի որ նմանատիպ մոլորությունները մեր հայրենակիցների շրջանում բավականին լայն տարածում են գտել, գուցե, իրոք լավ կլիներ դպրոցներում սեռակրթության դասեր http://med.news.am/arm/news/3080/serakan-dastiarakutyan-elektiv-dasyntacner-haykakan-dprocnerum.html ներառել, որպեսզի երեխաները վաղ հասակից ճիշտ, գրագետ տեղեկատվություն ստանան հենց մասնագետներից, եւ ոչ թե՝ փողոցի ընկերներից կամ ոչ միշտ գրագետ բարեկամներից:

Հետևեք NEWS.am Medicine-ին Facebook-ում և Twitter-ում