Ի՞նչով է վտանգավոր գրիպը, որով վարակվել են Տյումեն-Ադլեր գնացքի երեխաները

A գրիպը, որը հայտնաբերվել է Տյումեն-Ադլեր գնացքից դուրս բերված երեխաների մոտ, ուղեկցվում է ծանր ձևերով և կարող է հանգեցնել մահվան: Այս հիվանդության առանձնահատկությունների մասին «360»-ին պատմել է կենսաբանական գիտությունների դոկտոր, պրոֆեսոր Պյոտր Չումակովը։

Ավելի քան 100 երեխա է իջեցվել Տյումեն-Ադլեր գնացքից և ուղարկվել Սարատովի մարզի ինֆեկցիոն հիվանդանոց։ Տարածաշրջանի ղեկավար Ռոման Բուսարգինը հայտնել է, որ 60 երեխայի մոտ սուր շնչառական վիրուսային վարակի նշաններ կան, իսկ 15 հոգու մոտ անալիզով հայտնաբերվել է A գրիպ։ Նահանգապետը հաստատել է նաև, որ գնացքում 12-ամյա աղջիկ է մահացել։

Չումակովը նշել է, որ A գրիպից բացի, կա B գրիպ: A գրիպը, ըստ պրոֆեսորի, հիմնականում թռչունների միջոցով է փոխանցվում և մեզ մոտ «թռչում-գալիս է» Հարավարևելյան Ասիայից, ինչի պատճառով էլ սեզոնային հերթական համաճարակն է սկսվում:

«Կարելի է ասել, որ սա թռչնագրիպ է, որը տարբեր ձևեր ունի և բնութագրվում է H1 և N1 անվանումներով,- ճշտել է կենսաբանական գիտությունների դոկտորը։- Այս դեպքում [գնացքի հետ կապված] ես չգիտեմ, թե որ  A գրիպն է հայտնաբերվել, բայց, ամենայն հավանականությամբ, դա այն է, ինչ սպասում էինք, այսպես կոչված, Հոնկոնգյան տարբերակը: Այն իսկապես շատ ավելի պաթոգեն է, քան B գրիպը:  B գրիպը մարդկային գրիպ է, այսինքն՝ շրջանառվում է միայն մարդկանց մեջ: Քանի որ այն շրջանառվում է մարդկանց մեջ բավականին երկար ժամանակ, ուստի,  այն աստիճանաբար վերածվում է ավելի մեղմ տարբերակի՝ ճիշտ այնպես, ինչպես COVID-ը»,- հավելել է նա։

Գրիպը, որը  մարդկանց է փոխանցվում կենդանիներից, օրինակ՝ թռչուններից կամ խոզերից, հակված չէ մեղմանալու, քանի որ վիրուսը գալիս է այլ տեսակից, բացատրել է փորձագետը։

Թռչունների մոտ գրիպի այս տեսակը հարմարվում է, ուստի ավելի հեշտ են տանում, բայց մարդիկ ծանր են հիվանդանում, նշել է Չումակովը։

«Հիմա երեխաները հիվանդ են այս գրիպով, պարզ չէ, թե ով է եղել դրա աղբյուրը։ Ամենայն հավանականությամբ, ինչ-որ վարակված երեխա կամ նույնիսկ մեծահասակ պարզապես նստել է այս գնացքը և վարակել այս գնացքում գտնվող երեխաներին, ինչի պատճառով էլ նման բռնկում է տեղի ունեցել։ Փակ տարածքներում, օրինակ՝ զբոսաշրջային նավերում, ինքնաթիռներում և այլ վայրերում այդպիսի բան լինում է: Շուտով  պարզ կդառնա, թե սա ինչ գրիպ է, և որքանո՞վ է անոմալիա, այսինքն՝ սպասվածի համեմատ ի՞նչ  ուրիշ տեսակ է»,- ասել է պրոֆեսորը։

Ըստ գիտությունների դոկտորի, գրիպն իսկապես երբեմն ուղեկցվում է ծանր ձևերով։ Բայց քանի որ ընդամենը մեկ երեխա է մահացել, վիճակագրության մասին դեռ պետք չէ խոսել, քանի որ դա կարող է հանգամանքների բերումով  լինել, ասել է «360»-ի զրուցակիցը։ 30 դեպքից առնվազն երկուսը կարելի է վիճակագրություն համարել, ճշտել է նա։

«Այո, սա, ըստ երեւույթին, լուրջ գրիպ է, որը կարող է մահվան պատճառ դառնալ: Բայց մենք չգիտենք, թե ինչով էր հիվանդ այդ աղջիկը, միգուցե սրտի ինչ-որ արատ կամ ուրիշ հիվանդություն ուներ»,- ընդգծել է կենսաբանը։

Պրոֆեսորը պարզաբանել է, որ սովորական մրսածությունն այնքան էլ սուր չի ընթանում, ինչպես գրիպը։ Մրսածության դեպքում, ըստ  կենսաբանական գիտությունների դոկտորի, առաջանում է կոկորդի ցավ և քթահոսություն, և մարդն իրեն վատ է զգում։ Գրիպը սովորաբար ավելի սուր ախտանիշներ ունի։

«Եթե դա գրիպի լուրջ ձև է, ապա սովորաբար դա բարձր ջերմություն է, լուսավախություն, երբ ցանկություն է առաջանում փակել վարագույրները, փսխում է լինում: Հիվանդությունն ավելի կտրուկ է սկսվում, նկատվում է թունավորում։ Սրանք առաջին նշաններն են, որ, ամենայն հավանականությամբ, դա գրիպ է, այլ ոչ թե պարզապես մրսածություն, որը կարելի է ոտքի վրա տանել»,- եզրափակել է Չումակովը:

Հետևեք NEWS.am Medicine-ին Facebook-ում և Twitter-ում