Մարտի 23-ին Մոսկվայում մեկնարկել է Արեւելյան Եվրոպայի եւ Կենտրոնական Ասիայի ՄԻԱՎ/ՁԻԱՀ-ին նվիրված Հինգերորդ համաժողովը, որին աշխարհի 59 երկրից 2500 մարդ է մասնակցում: Հայաստանի պատվիրակությունը, որի կազմում ավելի քան 20 անդամ կա, համաժողովին մասնակցում է առողջապահության փոխնախարար Գագիկ Միրիջանյանի գլխավորությամբ:
Ինչպես լրագրողների հետ զրույցում նշել է փոխնախարարը, Համաժողովը Հայաստանից եկած մասնագետներին հնարավորություն կտա ծանոթանալ այլ երկրների փորձին, ինչպես նաեւ նրանց ներկայացնել ՄԻԱՎ-ի ախտորոշման եւ վերահսկման իրենց փորձը: 28 տարի է անցել այն ժամանակվանից, երբ Հայաստանում ախտորոշվեց ՄԻԱՎ-ի առաջին դեպքը, նշել է Գագիկ Միրիջանյանը: Այդ ժամանակվանից Հայաստանը հսկայական աշխատանք է կատարել ՄԻԱՎ-ի կանխարգելման, ախտորոշման եւ բուժման ոլորտում: Մասնավորապես` ՄԻԱՎ-ի մորից երեխային փոխանցման վերջին դեպքը գրանցվել է 2007-ին, իսկ դոնորական արյան միջոցով վիրուսի փոխանցման վերջին դեպքը` ավելի վաղ` 2001-ին:
Համաժողովը նշանակալի է նրանով, որ դրա ընթացքում Հայաստանը նվեր կստանա շարժական կլինիկա, որը կօգնի հեշտացնել երկրի մարզերում ՄԻԱՎ-ի ախտորոշումը:
Ինչպես իր ներածական ելույթում նշել է Ռուսաստանի Դաշնության փոխվարչապետ Օլգա Գոլոդեցը, ՄԻԱՎ-ը, որն արդեն 30 մլն կյանք է խլել, լուրջ սպառնալիք է ներկայացնում ամբողջ մարդկության համար եւ բացասաբար է ազդում ինչպես երկրների ժողովրդագրական վիճակի, այնպես էլ տնտեսական զարգացման վրա: Այդ պատճառով ՄԻԱՎ-ի խնդիրը գլոբալ է եւ միայն բժիշկներին չի վերաբերում:
«Վստահ եմ, որ մեր համատեղ ջանքերը կօգնեն հաղթահարել այդ գլոբալ խնդիրը եւ մինչեւ 2030 թվականը վերջ դնել ՁԻԱՀ-ի համաճարակին, ինչը ՄԱԿ-ի կայուն զարգացման նպատակներից մեկն է համարվում», - նշել է նա:
Համաժողովը կազմակերպել է ռուսաստանյան Սպառողների իրավունքների պաշտպանության եւ մարդու բարօրության ոլորտի վերահսկողության դաշնային ծառայությունը, ՄԱԿ-ի ՄԻԱՎ/ՁԻԱՀ-ի հարցերով Միացյալ ծրագիրը (ՅՈՒՆԷՅԴՍ) եւ Համաժողովի քարտուղարությունը:
Համաժողովի ծրագիրը կազմված է լիագումար նիստերից, զուգահեռ նստաշրջաններից եւ հմտությունների ձեւավորման սեմինարներից: Նիստերից մեկի ընթացքում նախագահելու է հայկական պատվիրակությունը, որը պիտի ներկայացնի Հայաստանում ՄԻԱՎ-ի կանխարգելման եւ ախտորոշման փորձը եւ ձեռքբերումները:
«Գիտություն եւ բժշկություն», «Աջակցություն միջազգային զարգացմանը» եւ «Քաղաքացիական հասարակություն» նստաշրջանները ՄԻԱՎ-ի հետ կապված ամենաայժմեական հարցեր կընդգրկեն եւ Համաժողովի պատվիրակներին նոր գիտելիքներ եւ հնարավորություններ կտրամադրեն տարբեր խնդիրների վերլուծության համար: Համաժողովը մասնակիցներին նաեւ հնարավորություն կտա քննարկել հուզող հարցեր, փորձի փոխանակում կատարել եւ պոտենցիալ զուգընկերների հետ նոր շփումներ հաստատել:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր