Նյու Յորքի համալսարանի Գրոսմանի բժշկակական դպրոցի եւ հանրային առողջապահության Հարվարդի դպրոցի գիտնականները պարզել են, որ բուսական սննդակարգը կարող է իջեցնել էրեկտիլ դիսֆունկցիայի հավանականությունը շագանակագեղձի քաղցկեղի դեպքում։ Արդյունքները հրապարակվել են Cancer ամսագրում։
Հետազոտությանը մասնակցել է ավելի քան 3 500 տղամարդ, որոնք շագանակագեղձի քաղցկեղ են ունեցել։ Այն ամենատարածվածն է տղամարդկանց շրջանում։
Կամավորների ֆիզիկական առողջության մասին տվյալներ ստանալուց հետո նրանց բաժանել են հինգ խմբի՝ կախված կերակրաբաժնում բուսական եւ կենդանական սննդի հարաբերակցությունից։ Գիտնականները փորձել են պարզել, թե արդյոք ազդում է օգտագործած մրգերի, բանջարեղենների, հացահատիկեղենի, ընդեղենի եւ ընկույզների քանակի ավելացումը սեռական ֆունցկիայի վրա։
Արդյունքները ցույց են տվել, որ այն խմբի համեմատ, որի կերակրաբաժնում գերազանցել է կենդանական ծագման սնունդը, բուսական սննդակարգի հետեւողների էրեկտիլ ֆունկցիան 8-11 տոկոսով ավելի լավ է եղել։ Նույն կերպ էլ հետազոտությունը ցուցադրել է միզուղիների առողջության ցուցանիշների բարելավում 14 տոկոսով։
Նշվել է նաեւ, որ ամենամեծ չափով բուսական մթերքներ օգտագործողների խմբի կամավորների հորմոնալ ֆոնն ավելի կայուն է եղել։ Նրանք ավելի հազվադեպ են զգացել ուժերի անկում, ապատիա եւ դեպրեսիա։
Հետազոտության հեղինակների կարծիքով՝ մսա- եւ կաթնամթերքների կրճատումը կարող է բարելավել կյանքի որակը վիրահատություններից (այդ թվում շագանակագեղձի) հետո։
Նրանք նաեւ ավելացրել են, որ մեծ քանակությամբ ցանկացած բուսական սննդի օգտագործումը կապված է սեռական առողջության եւ միզուղիների վիճակի բարելավման հետ՝ անկախ ժողովրդագրական գործոնից, կենսակերպի տարբերություններից կամ անամնեզում այլ հիվանդությունների առկայությունից։
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր