4 գաղտնիք, որոնք կօգնեն մինչեւ 100 տարի ապրել

Իտալական Աչչարոլի գյուղի բնակիչներն աչքի են ընկնում երկարակեցությամբ եւ ամուր առողջությամբ, նույնիսկ տարեց հասակում նրանց մոտ հազվադեպ են սրտանոթային հիվանդություններ, ձեռքբերովի թուլամտություն եւ խրոնիկական այլ հիվանդություններ զարգանում: Sapienza University-ի գիտնականները San Diego School of Medicine-ից հետազոտական խմբի հետ միասին հետազոտություն են անցկացնում այդ երկրում` պարզելու, թե որն է այդ մարդկանց երկարակեցության գաղտնիքը:  

Ալան Մայզելն ու իր գործընկերներն արդեն 80 մարդու են հետազոտել, որոնցից 25-ի հարյուր տարին արդեն լրացել է: Վերջերս գիտնականները հրապարակել են իրենց հետազոտությունների առաջին արդյունքները:  

Սնունդը

Իրենք` գյուղի բնակիչները համարում են, որ իրենց երկարակեցության գաղտնիքը ճիշտ սնունդն է: Նրանք հետեւում են այսպես կոչված միջերկրածովյան սննդակարգին. նրանց սննդակարգը հարուստ է բանջարեղենով, մրգերով, ձիթայուղով եւ ձկով: Նրանց խոսքով, իրենք բնական բաներ են ուտում. բանջարեղեն եւ միրգ են աճեցնում, հավ եւ ճագար են պահում, ձուկ են որսում: 

Բացի այդ, Աչչարոլիի բնակիչները շատ հազրեվարդ են ուտում, որը, ինչպես ավելի վաղ ապացուցվել էր, դրականորեն է ազդում գլխուղեղի աշխատանքի վրա: 

Բնական միջավայրը

Այն վայրը, որտեղ գտնվում է գյուղը, աչքի է ընկնում բնական լավ միջավայրով. Աչչարոլին հեռու է խոշոր բնակավայրերից եւ արտադրություններից: Հավանաբար դա եւս ազդում է գյուղի բնակիչների աողջության վրա: 

Ակտիվ կենսակերպ

Չի կարելի չնշել նաեւ ակտիվ կենսակերպը, որ վարում են այդ գյուղի բնակիչները. նրանք զբաղվում են գյուղատնտեսությամբ, ձկնորսությամբ եւ այգով, շատ են ոտքով քայլում: 

Սեքսը

Նույնիսկ տարեց հասակում գյուղի շատ բնակիչներ պահպանում են սեռական ակտիվությունը, ինչը եւս հավանաբար իր դերն է խաղում առողջության պահպանման գործում: 

Գիտնականները նկատել են, որ հետազոտության մասնակիցների մեծամասնության արյունատար համակարգի վիճակն անհամեմատ ավելի լավ է, քան այլ շրջաններից նրանց տարեկիցների եւ նույնիսկ շատ ավելի երիտասարդ մարդկանց մոտ: Առայժմ հայտնի չէ, թե ինչի հետ է կապված դա, բայց գիտնականները հույս ունեն պատասխան գտնել այդ հարցին, չէ որ այդ դեպքում Աչչարոլիի բնակիչների փորձը կարող է օգտակար լինել մնացած բոլորին: 

Իմիջիայլոց, հետաքրքիր է, որ գյուղի ամեն տասներորդ բնակիչ  100 տարուց ավելի երկար է ապրում, իսկ տղամարդկանց եւ կանանց շրջանում երկարակյացների քանակը միանման է, չնայած մնացած բոլոր բնակելի վայրերում կանայք սովորաբար տղամարդկանցից ավելի երկար են ապրում:

Հետևեք NEWS.am Medicine-ին Facebook-ում և Twitter-ում