• Latest news

Էմբոլիզացիայից 1 տարի անց կնոջ արգանդի միոմայի ծավալը 8 անգամ կրճատվել է

23 հունվարի, 2017  20:25

Առաջին անգամ Հայաստանում «Էրեբունի» բժշկական կենտրոնում կատարվել է արգանդի միոմայի անոթների էմբոլիզացիա այն դեպքում, երբ արգանդի չափսը գերազանցում է 20 շաբաթական հղիության չափսերին։ Վիրահատությունը կատարվել է դեռ 2015 թվականի նոյեմբերին, իսկ 2016 թվականի դեկտեմբերին կատարած ստուգիչ ՈւՁՀ հետազոտությունը ցույց է տվել, որ մեծ հանգույցի ծավալը մեկ տարում փոքրացել է 8 անգամ։ Վիրահատության ռիսկային գործոնը բավականին բարձր էր, սակայն, ինչպես ասվում է՝ ռիսկը ազնվական գործ է, երբ հարցը վերաբերում է հիվանդի կյանքին եւ առողջությանը, ասվում է հիվանդանոցի կայքում զետեղված հոդվածում։

Արտերկրում բնակվող, 1978 թ. ծնված, հայուհի Է.Մ-ն. միոմայի վիրահատության կապակցությամբ դիմել է «Էրեբունի» ԲԿ 2015թ. նոյեմբերին։

Կինը ենթադրում էր, որ հղի է, քանի որ որովայնի չափսերը մեծացել էին եւ համապատասխանում էին 20 շաբաթական հղիության: Ըստ ՈւՁՀ-ի տվյալների ախտորոշվեց՝ արգանդի բազմահանգույց միոմա (ամենամեծ ոտիկի վրա հանգույցի չափերն էին 180×106×166 մմ, հանգույցի ծավալը 1660 սմ³), ինչպես նաեւ փոքր չափսերի (˜3 սմ ) մի քանի հանգույցներ` արգանդի խոռոչի ձեւափոխմամբ:

Ուղեկցող հիվանդությունների պատճառով՝ համակարգային կարմիր գայլախտ, հակաֆոսֆոլիպիդային համախտանիշ, թոքային զարկերակի թրոմբոէմբոլիա (ԹԶԹԷ), միտրալ ռեգուրգիտացիա IV, թոքային հիպերտենզիա I, հիվանդին հակացուցված էր բաց վիրահատության անցկացումը: Օրակարգի հարց էր դարձել հիվանդի բուժումը անցկացնել այլընտրանքային եղանակով՝ կատարելով արգանդի խողովակների էմբոլիզացում: Հիվանդը դիմել էր տարբեր արտասահմանյան կլինիկաներ, սակայն մերժում էր ստացել, քանի որ այս չափսերի միոմայի դեպքում նույնիսկ էմբոլիզացիա կատարելը չափազանց ռիսկային է:

Չունենալով այլ տարբերակ,2015թ. նոյեմբերի 5-ին Էրեբունի ԲԿ-ի անգիոգրաֆիայի ծառայության ինտերվենցիոն սրտաբան Արսեն Ծատությանը իրականացրեց արգանդային զարկերակների էմբոլիզացիա:

Միոմայի մեծ չափսերի պատճառով հետվիրահատական շրջանում հիվանդի մոտ դիտվել էր մեղմ արտահայտված հետէմբոլիզացիոն համախտանիշ (ցավեր կոնքի շրջանում, ջերմություն, սրտխառնոց, փսխում), որը դեղորայքի միջոցով վերացվեց: Հիվանդը դուրս է գրվել 7-րդ օրը բավարար վիճակում:

Մեկ տարի անց- 2016թ. դեկտեմբերին, կրկին կատարվեց ՈւՁՀ հետազոտություն՝ մեծ հանգույցի չափսերը փոքրացել էին համարյա երկու անգամ՝ մինչեւ 73×76×70 մմ, իսկ հանգույցի ծավալը նախորդի հետ համեմատ 8 անգամ՝ 206.8 սմ³ (87%): Փոքր հանգույցներից պահպանվել էր միայն մեկը՝ 22 × 27մմ, առանց արգանդի ձեւափոխման: Հիվանդը այլեւս գանգատ չուներ:

Էմբոլիզացիան հատկապես կարեւոր է, երբ արգանդի հեռացման հարց է դրված: Համապատասխան ցուցումների դեպքում արգանդի զարկերակների էմբոլիզացիան համարվում է արգանդի միոմայի բուժման մեղմ եւ ռադիկալ եղանակներից մեկը, որի երկարատեւ արդյունքները չեն զիջում բաց վիրահատական միջամտությանը՝ պահպանելով սեռական օրգանը եւ կնոջ պտղաբերությունը:

https://erebunimed.com/arm/news.more/236

Հետևեք NEWS.am Medicine-ին Facebook-ում և Twitter-ում


 
  • Կարդացեք նաև
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է