ԴԱՆ ղեկավարը՝ Զիպրեքսայի ծրագրի շուրջ աղմուկի մասին. Eli Lilly-ի ներկայացուցչությունը սահմանագիծն անցել է

«Հոգեկան առողջության վերականգնման հայկական ասոցիացիա» հասարակական կազմակերպության ետեւում կանգնած է Eli Lilly ընկերության (օրիգինալ օլանզապին՝ Զիպրեքսա արտոդրողի) հայաստանյան ներկայացուցչությունը: Եվ այս ներկայացուցչության մարքեթինգային քաղաքականությունը՝ մրցակիցների վրա ցեխ շպրտելը բարոյական չէ, կարծում է Հայաստանի Դեղ արտադրողների եւ ներմուծողների միության ղեկավար Սամվել Զաքարյանը:

NEWS.am Medicine-ի հետ զրույցում նա նշեց, որ Eli Lilly-ի հայաստանյան ներկայացուցիչ Սիլվա Բարսեղյանն իրեն այսպես է պահում տարիներ շարունակ, եւ սա, վերջիվերջո, պետք է դադարեցվի: Նրա խոսքով՝ «ինչը որ մերը չէ՝ վատն է» դիրքորոշումն անընդունելի է, հատկապես դեղերի տեղական արտադրողի՝ «Արփիմեդ» ընկերության նկատմամբ:

«Ոչ ոք չի վիճարկում Eli Lilly-ի արտադրանքի որակը, այն իսկապես աշխարհում լավագույններից մեկն է, բայց չի կարելի դրանից օգտվելով՝ սեւացնել այլընտրանքային դեղերը»,- ասաց նա՝ հավելելով, որ Eli Lilly-ի հայաստանյան ներկայացուցչությունը «մեր համակարգում կեղտ է, քաղցկեղային ուռուցք, որը ժամանակի ընթացքում տարածվում է»: Նա նշեց, որ Դեղ արտադրողների եւ ներմուծողների միությունը սա չի հանդուրժի Հայաստանի դեղագործական ոլորտում:

Սամվել Զաքարյանի խոսքով՝ «Հոգեկան առողջության վերականգնման հայկական ասոցիացիա» հ/կ-ի ղեկավար Կարինե Թուխիկյանի գործողությունները, որն իբր մտահոգվում է պետական շահով եւ հիվանդների կարիքներով, ուղղված են միայն Զիպրեքսա դեղի առաջմղմանը:

«Նա իրավունք չունի պիտակավորելու մյուս երկրների արտադրած դեղերը, առավել եւս՝ հայրենական արտադրողի: Բայց ամենագլխավորն այն է, որ նա իրավունք չունի նման ելույթներով խուճապ սերմանել սպառողների շրջանում»,- ասաց ԴԱՆ միության ղեկավարը՝ հավելելով, որ եթե «Հոգեկան առողջության վերականգնման հայկական ասոցիացիա» հ/կ-ն այդքան վստահ է իր իրավացիությանը, ապա թող ինքը Զիպրեքսայի եւ «Արփիմեդի» օլանզապինի անկախ փորձաքննություն կազմակերպի, այլ ոչ թե մերկապարանոց հայտարարություններ անի:

Սամվել Զաքարյանը նշեց, որ նման գործողությունների հետեւանքով տուժում են միայն հիվանդները, որոնց ենթագիտակցության մեջ տպավորվում է, որ հայկական դեղերը չեն ներգործում: Հաշվի առնելով, թե որքան ներշնչվող են հոգեկան հիվանդները, սա, Միության նախագահի խոսքով, անմարդկայնություն է եւ հակասում է բժշկական էթիկայի բոլոր կանոններին:

«Անթույլատրելի է նեղ անձնական շահերի պատճառով խաղալ Հայաստանի դեղագործական ամբողջ ոլորտի եւ հիվանդների ճակատագրի հետ: Իսկ սա զուտ դրա օրինակն է: Օլանզապինը ջեներիկ է, եւ «Արփիմեդն» այն արտադրում է ու տվյալ դեղի երկրի պահանջներն ապահովում պետգնման միջոցով՝ էժան գին առաջարկելով: Հավատացեք՝ նա չէ այն թշնամին, որը ցանկանում է իր ժողովրդին վնաս պատճառել, ինչպես փորձում են ներկայացնել, այլ հենց արտասահմանյան այն ընկերությունները, որոնց անբարեխիղճ ներկայացուցիչները փորձում են իրենց վաճառքն ապահովել»,- ասաց նա: Սամվել Զաքարյանի խոսքով՝ Զիպրեքսայի վերաբերյալ հնչող հայտարարությունները գովազդի շատ վատ ձեւ են, անբարեխիղճ մարքեթինգ:

Նա նշեց, որ «Արփիմեդ» ընկերությունն ի վիճակի չէ բժիշկներին «կաշառելու» թանկարժեք նվերներով, համաժողովների արտասահմանյան ուղեւորություններով եւ վաճառքից տոկոսներով, ինչպես դա անում է  Eli Lilly–ն։ Նրա խոսքով՝ հենց սրանով է բացատրվում, որ ոչ պաշտոնական զրույցներում հոգեբույժներից շատերը նույնպես խոսում են տեղական դեղամիջոցների ցածր որակի մասին: «Բայց եթե այս բժիշկներն այդքան վստահ են «Արփիմեդի» դեղերի վատ որակի մեջ, թող այդ մասին պաշտոնապես ասեն, այլ ոչ թե մասնավոր զրույցներում, թող քննություն լինի»,- նշեց նա: ԴԱՆ միության նախագահի խոսքով՝ ի վերջո, ե՛ւ «Արփիմեդի» ջեներիկը, ե՛ւ Զիպրեքսան միեւնույն փորձաքննությունն են անցել, ըստ որում՝ անանուն ռեժիմով, Հայաստանի Դեղերի եւ տեխնոլոգիաների փորձագիտական կենտրոնում:

Սամվել Զաքարյանը հիշեցրեց, որ սա Eli Lilly-ի հայաստանյան ներկայացուցչության հետ կապված առաջին սկանդալը չէ, նախկինում արդեն համանման դեպք եղել է ինսուլինի հետ: «Այս ընկերության ներկայացուցիչն անչափ բազմաժանր եւ հավանաբար, իր կարծիքով, կրեատիվ մոտեցավ հասարակական կարծիքի ձեւավորմանը՝ դրա համար օգտագործելով հ/կ-ին: Դրա փոխարեն նրանք փող չեն ծախսում մարքեթինգային ուրիշ միջոցառումների համար: Սա մի քանի տարի աշխատել է, հնարավոր է՝ նրանք եղանակներ են գտել նաեւ պետական պաշտոնյաների վրա ներգործելու համար, սակայն նոր նախարարը սա կասեցրեց»,- ասաց նա՝ հավելելով, որ այդ գործին ներգրավելով հիվանդների հարազատներին Eli Lilly ընկերության ներկայացուցչությունը հատել է թույլատրելիի սահմանագիծը:

Սամվել Զաքարյանը հայտնեց, որ ներկայումս ԴԱՆ միությունը ՏՄՊՊՀ-ին առաջարկներ է ներկայացրել դեղագործական արտադրողների պատշաճ պրակտիկայի կանոնագրքի վերաբերյալ, որը դեղագործական ոլորտում վարքի հստակ կանոններ կսահմանի:

Հիշեցնենք, որ ապրիլի 11-ին մամուլի ասուլիսի ժամանակ «Հոգեկան առողջության վերականգնման հայկական ասոցիացիա» հ/կ-ի ղեկավար Կարինե Թուխիկյանը «Զիպրեքսայով արտահիվանդանոցային բուժման» ավարտված ծրագրի շահառուների հարազատների հետ դժգոհել է Առողջապահության նախարարության կողմից տրված կանադական  Apotex ընկերության օլանզապին դեղի որակից, որը ստացվել է հումանիտար խողովակներով, ինչպես նաեւ «Արփիմեդ» տեղական ընկերության օլանզապինի որակից: Նրանք պահանջում են Զիպրեքսայով բուժման վերականգնում:

Ավելի ուշ Առողջապահության նախարարությունը հանդես է եկել հայտարարությամբ, որով մեղադրել է «Հոգեկան առողջության վերականգնման հայկական ասոցիացիա» հ/կ-ին ապատեղեկատվության տարածման մեջ:

Հետևեք NEWS.am Medicine-ին Facebook-ում և Twitter-ում