Ձեռքերը լվանալն օգնում է «վերբեռնել» ուղեղը, կպչուն մտքերից ազատվել եւ ինչ-որ նոր բանի տրամադրվել: Այս մասին հայտնել են University of Toronto-ի գիտնականները:
Գիտնականների կարծիքով՝ ձեռքերը լվանալը կամ թաց անձեռոցիկով մաքրելը ինչ-որ ձեւով խթանում է արյան մատակարարումը, ինչն իր հերթին ուղեղն ազատում է հին գաղափարներից եւ այն ուղղորդում նոր խնդիրների լուծմանը: Կանադացի հետազոտողները նման գաղափար են առաջ քաշել՝ 4 փորձ անցկացնելով:
Առաջին փորձի մասնակիցները պետք է հաղթահարեին թեստեր, որոնք նրանց ստիպում էին կենտրոնանալ կոնկրետ նպատակների վրա: Ինչ-որ պահի կամավորներին ձեռքերը մաքրելու համար թաց անձեռոցիկներ են տվել, իսկ ոմանց՝ ոչ, որից հետո նրանց նոր խնդիրներ են առաջադրել: Գիտնականները նկատել են, որ թաց անձեռոցիկներից օգտված մասնակիցներն ավելի արագ են անցել նոր խնդիրների լուծմանը եւ դրանք ավելի լավ են կատարել:
Կատարված այլ հետազոտություններով նույնպես հաստատվել է, որ ձեռքերը լվանալն իսկապես ազդում է մարդու մտածողության վրա:
Մասնագետների խոսքով՝ նոր նպատակների ուղղությամբ արագ վերակառուցվելու ունակությունը մարդկանց օգնում է ավելի լավ դրսեւորվել աշխատավայրում եւ արդյունավետորեն հաղթահարել առօրյա կյանքի տարբեր խնդիրների լուծումը: Շատերը «թաղվում» են ինչ-որ մի բանի մեջ եւ ոչ մի այլ հեռանկար չեն տեսնում: Հնարավոր է, որ ձեռքերը լվանալը նման խնդիրների հաղթահարման պարզ միջոց դառնա:
Ճիշտ է, գիտնականները դեռեւս չգիտեն, թե ձեռքերը լվանալու շնորհիվ որքան երկար է պահպանվում ուղեղի խթանման էֆեկտը: Նրանք նշում են, որ հետագա հետազոտությունների անհրաժեշտություն կա:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր