ԱՄՆ-ում հաստատել են 20 տարվա ընթացքում առաջին դեղամիջոցը մանգաղաձեւ բջջային անեմիայով հիվանդների համար

Ամերիկյան FDA-ը հաստատել է 20 տարվա ընթացքում առաջին դեղամիջոցը մանգաղաձեւ բջջային անեմիայով (վտանգավոր գենետիկ արյան հիվանդություն) տառապող հիվանդների համար:

Նախկինում մանգաղաձեւ բջջային անեմիայով տառապող հիվանդներին միայն հիդրոքսիկարբամիդ էին նշանակում: Հիմա բժշկական պրակտիկայում նոր դեղամիջոց կլինի՝ L-գլուտամին ամինաթթու (առեւտրային անվանումը՝ Endari), որը մշակել է Emmaus Medical Inc. ընկերությունը: Այն կարող է նվազեցնել հիվանդության՝ ծանր արտահայտվող բարդացումները, բայց հիվանդությունը բուժել չի կարող:

Մանգաղաձեւ բջջային անեմիայի դեպքում հեմոգլոբինը բյուրեղաձեւ կառուցվածք է ձեռք բերում: Դա սահմանափակում է արյան հոսքը, թթվածնի մատակարարումը եւ հանգեցնում քրոնիկական հիպոքսիայի, անեմիայի եւ ցավային համախտանիշի:

Նոր դեղամիջոցի արդյունավետությունը հաստատվել է 5-58 տարեկան հիվանդների մասնակցությամբ կլինիկական փորձարկումների արդյունքում: Կամավորներին նոր դեղորայքով բուժել են 48 ամիս: Հետազոտությունը ցույց է տվել, որ նոր միջոցը կրճատում է ցավային համախտանիշը նվազեցնելու համար բժշկի այցելություների հաճախությունը՝ ի տարբերություն պլացեբոյի: Բացի այդ՝ պակասել են հոսպիտալացման դեպքերի թիվը, ստացիոնար բուժում անցնելու օրերի քանակը:

Նոր դեղորայքը կարելի է նշանակել 5 տարեկանից բարձր երեխաներին եւ մեծահասակներին:

FDA-ի տվյալներով՝ դեղամիջոցի տարածված կողմնակի ազդեցություններից են փորկապությունը, սրտխառնոցը, գլխացավը, փորացավը, հազը, վերջույթներում եւ մեջքի ու կրծքավանդակի շրջանում ցավերը:

Հետևեք NEWS.am Medicine-ին Facebook-ում և Twitter-ում