Դերմատիտը կապված է 2 տարեկանից բարձր տարիքի երեխաների մոտ ավելորդ քաշի եւ ցածր հասակի հետ  

Տորոնտոյի կանանց քոլեջի հիվանդանոցի մասնագետները որոշել են գնահատել ատոպիկ դերմատիտի, երեխաների հասակի եւ քաշի միջեւ կապը։

Նրանք օգտվել են TARGet Kids կանադական ուսումնասիրության տվյալներից, որը տեւել է 2008-2021 թթ․։ Ուսումնասիրությանը մասնակցել են 5 տարեկան եւ ավելի փոքր երեխաներ, նրանց առողջական վիճակին հետեւել են մեծանալուն զուգընթաց։ Նոր վերլուծության մեջ ներառվել են 2 տարեկան 10,6 հազար երեխաների տվյալներ։

Գիտնականներն ուսումնասիրել են ծնողների հարցման արդյունքները, որոնցում նրանք պատասխանել են երեխաների մոտ դերմատիտի ախտանիշների վերաբերյալ հարցերին, ինչպես նաեւ նրանցից յուրաքանչյուրի հասակի եւ մարմնի քաշի տվյալները:

Պարզվել է, որ էկզեմայով տառապող երեխաները 2 տարեկանում միջինում 0,5 սմ-ով ցածրահասակ են եղել առանց այդ հիվանդության հասակակիցների համեմատ, իսկ 5 տարեկանում՝ արդեն 0,6 սմ-ով: Սակայն այդ տարբերությունը հարթվել է դերմատիտով տառապող գրեթե բոլոր մասնակիցների մոտ՝ 14 տարեկանում:

Գիտնականները նաեւ հայտնաբերել են դերմատիտի եւ ավելորդ քաշի անմիջական կապ տարբեր տարիքային խմբերում: Դեռ հայտնի չէ, թե արդյոք այդ տարբերությունները կպահպանվեն հասուն տարիքում: Դա պարզելու համար անհրաժեշտ են ավելի խոշոր եւ երկարատեւ դիտարկումներ, նշել են հետազոտության հեղինակները:

Հետևեք NEWS.am Medicine-ին Facebook-ում և Twitter-ում