Քնի լրացուցիչ մեկ ժամը իջեցնում է արյան ճնշումը. Sleep Health

ԱՄՆ Փենսիլվանիայի նահանգի համալսարանի հետազոտողները պարզել են, որ քնի լրացուցիչ մեկ ժամը կարող է իջեցնել արյան ճնշումը եւ կարգավորել գլյուկոզայի մակարդակն արյան մեջ, գրել է Sleep Health ամսագիրը։

Գիտնականները կենտրոնացել են առողջ մարդկանց գիշերային քնի տեւողությունը մեկ ժամով ավելացնելու ազդեցության ուսումնասիրման վրա՝ մեկ շաբաթվա ընթացքում։ Փորձին մասնակցել է 18-23 տարեկան 12 մարդ, որոնց մարմնի միջին զանգվածը եղել է 24,5։ Նշվել է, որ մասնակիցները ֆիզիկական եւ հոգեկան առողջության խնդիրներ չեն ունեցել։

Մեկ շաբաթվա ընթացքում մասնակիցները քնել են իրենց սովորական ռեժիմին համապատասխան։ Այդ ընթացքում գիտնականները հավաքել են տեղեկություն քնի տեւողության եւ որակի մասին՝ ակտիգրաֆ ժամացույցի օգնությամբ։ Հետազոտողները գրանցել են նաեւ փորձարկվողների շարժողական սովորությունները ազդրերի ակսելերոմետրերի օգնությամբ ։

Բացի այդ, կամավորները տվել են մեզի եւ արյան նմուշներ նախնական անալիզի համար։ Տեղեկություն է հավաքվել նաեւ նրանց արյան ճնշման մակարդակների, սրտի զարկերի հաճախականության եւ մետաբոլիկ ռեակցիաների մասին՝ ստանդարտ սնունդ ընդունելու պարագայում։

Հաջորդ փորձի ընթացքում (հետազոտության երկրորդ շաբաթ) մասնակիցներին հանձնարարել են մեկ ժամով ավելացնել գիշերային քնի տեւողությունը։ Հաշվարկվել է, որ կամավորներին միջինը հաջողվել է 43 րոպեով երկարացնել գիշերային հանգիստը։ Այս փոփոխությունը, մասնակիցների ինքնազգացողության գնահատման համապատասխան, հանգեցրել է առույգության բարձրացման։ Բացի այդ, քնի տեւողության ավելացումը կապված է եղել սիստոլիկ զարկերակային ճնշման իջնելու հետ։

Հետազոտությունը նաեւ ցույց է տվել, որ արյան մեջ գլյուկոզայի մակարդակի վերականգնմանն անհրաժեշտ ժամանակը, սնունդն ընդունելուց հետո ելակետային մակարդակին հասնելու համար, կրճատվել է։ Սա վկայում է այն մասին, որ օրգանիզմում բարելավվել է գլյուկոզայի մակարդակի կարգավորումը, ինչը կարեւոր գործոն է շաքարային դիաբետի բուժման եւ կանխարգելման համար։

Հետևեք NEWS.am Medicine-ին Facebook-ում և Twitter-ում