Բացահայտվել են արյան շաքարի մակարդակն արդյունավետորեն նվազեցնող մթերքները

Ավստրալական Էդիթ Քոուենի համալսարանի մասնագետները պարզել են, որ տերևավոր կանաչեղենի և խաչածաղկավոր բանջարեղենի օգտագործումը օգնում է կարգավորել արյան շաքարի մակարդակն ու բարձրացնել ինսուլինի նկատմամբ զգայունությունը: Գիտնականները հետազոտության արդյունքները հրապարակել են Journal of Clinical Endocrinology & Metabolism (JCEM) բժշկագիտական հանդեսում:

Փորձին մասնակցել է 25 տարեկանից բարձր ութ հազար մարդ։ Ըստ Planet Today-ի՝ նախ, նրանց խնդրել են լրացնել հարցաթերթիկներ՝ գնահատելու համար իրենց սննդի որակը։ Գիտնականներին առաջին հերթին հետաքրքրում էր, թե ինչքան են մարդիկ օգտագործում տերևավոր կանաչեղեն (սպանախ, հազար, համեմի, ցանովի Ճարճրուկ) և խաչածաղկավոր բանջարեղեն (բրյուսելյան կաղամբ, ծաղկակաղամբ, կաղամբ ինչպես նաև՝ բրոկոլի):

Այնուհետև ծրագրի մասնակիցներից վերցվել են արյան նմուշներ՝ որոշելու համար շաքարի, շիճուկի ինսուլինի և ինսուլինի զգայունության մակարդակը և β-բջիջների գործառույթը: Վերջիններս ենթաստամոքսային գեղձի բջիջներ են և գլյուկոզայի հոմեոստազի և ինսուլինի արտադրության մեջ առաջնային նշանակություն ունեն։

Հետազոտությունն իրականացվել է երկար տարիների ընթացքում, մի քանի անգամ թեստեր են արվել։ Պարզվել է, որ տարբեր բանջարեղենի սպառման ավելացման դեպքում արյան մեջ գլյուկոզայի մակարդակն ավելի ցածր է եղել։ Մինչդեռ տերևավոր կանաչեղենի և խաչածաղկավոր բանջարեղենի համամասնության աճը նպաստում է ինսուլինի նկատմամբ մարմնի զգայունության բարձրացմանն ու այս հորմոնի մակարդակի կարգավորմանը:

Հետևեք NEWS.am Medicine-ին Facebook-ում և Twitter-ում