ՀՀ առողջապահության նախարարության ՁԻԱՀ-ի կանխարգելման հանրապետական կենտրոնում այսօր տեղի ունեցավ Հայաստանի Հանրապետությունում ՄԻԱՎ/ՁԻԱՀ-ի հակազդմանն ուղղված Ռուսաստանի Դաշնության աջակցության ծրագրի շրջանակում կենտրոնին նվիրաբերված շարժական բժշկական-ախտորոշիչ համալիրի բացումը։ Հանդիսությանը ներկա էին ՀՀ առողջապահության նախարար Արմեն Մուրադյանը եւ Հայաստանում ՌԴ արտակարգ եւ լիազոր դեսպան Իվան Վոլինկինը: Այս մասին NEWS.am Medicine-ին հայտնեցին առողջապահության նախարարության մամլո ծառայությունից:

«Առողջապահության նախարարությունը բարձր է գնահատում Ռուսաստանի Դաշնության կառավարության աջակցությունը Հայաստանի Հանրապետությունում ՄԻԱՎ/ՁԻԱՀ-ին հակազդման գործում», - ասաց Արմեն Մուրադյանը:

Նրա խոսքով` շարժական բժշկական-ախտորոշիչ համալիրը հնարավորություն կտա Հայաստանի ամենահեռավոր բնակավայրերի խոցելի բնակչության` աշխատանքային միգրանտների ու նրանց ընտանիքների շրջանում անվճար հիմունքներով բացահայտել ոչ միայն ՄԻԱՎ/ՁԻԱՀ-ը, այլեւ դրան զուգակցվող սեռավարակները, հեպատիտները եւ այլ հիվանդությունները` պահպանելով կամավորության ու գաղտնիության սկզբունքները:

Ապահովելով բժշկական ծառայությունների մատչելիությունը` միաժամանակ կիրականացվեն այլ ծառայություններ, զգալիորեն կմեծանա բժշկական խորհրդատվության ու լաբորատոր հետազոտության հասանելիությունը, ինչն էլ իր հերթին կնպաստի ՄԻԱՎ-ի վաղ ախտորոշման բարելավմանն ու բուժման արդյունավետությանը, ինչպես նաեւ խնամքի ժամանակին տրամադրմանը։

Դեսպան Իվան Վոլինկինը նշեց, որ շարժական բժշկական-ախտորոշիչ համալիրն առողջապահության ոլորտում հայ-ռուսական հարաբերությունների ամրապնդման նոր սկիզբ է: Հաջողություն մաղթելով ծրագրին` դեսպանը շնորհակալություն հայտնեց միջազգային կազմակերպություններին` ցուցաբերած աջակցության համար:

ՄԻԱՎ/ՁԻԱՀ-ի կանխարգելման հանրապետական կենտրոնի տնօրեն Սամվել Գրիգորյանը նշեց, որ շարժական կլինիկան Հայաստանին է հանձնվել մայիսին Մոսկվայում կայացած Արեւելյան Եվրոպայում եւ Կենտրոնական Ասիայում ՄԻԱՎ/ՁԻԱՀի հարցերին նվիրված չորրորդ կոնֆերանսի ժամանակ:

Լրագրողների հետ զրույցում Արմեն Մուրադյանը նշեց, որ յուրաքանչյուր առողջապահական ծրագրի իրականացման գործում կարեւոր է հիվանդության վաղ հայտնաբերումն ու ռիսկի գործոնների բացահայտումը:

«Հաշվի առնելով, որ շարժական կլինիկան հագեցած է նաեւ ախտորոշիչ այլ սարքավորումներով, այն կնպաստի առողջապահական ծրագրերի իրականացմանը։ Բժշկական-ախտորոշիչ համալիրիգործունեությունը կնպաստի բժշկական ծառայությունների հասանելիությանը եւ դիմելության բարձրացմանը», - ասաց նախարարը:

Հայաստանում այսօր գրանցված է ՄԻԱՎ վարակով 1785 մարդ (հաշվարկային թիվը` 3700), որոնցից 911-ի մոտ ՁԻԱՀ է ախտորոշվել։