Անբարեխիղճ ատամնաբույժը կարող էր 600 մարդու ՄԻԱՎ-ով եւ հեպատիտով վարակել

Վիսքոնսինում Tomah Veterans Affairs Medical Center բժշկական կենտրոնի անբարեխիղճ ատամնաբույժը կարող էր հարյուրավոր մարդկանց ՄԻԱՎ ինֆեկցիայով եւ վիրուսային հեպատիտով վարակել, քանի որ չէր պահպանել աշխատելիս օգտագործվող գործիքների ախտահանման կանոնները: Բժշկի խախտումներով աշխատելու մասին հայտնել է նրա ասիստենտը:

Հնարավոր վարակման վտանգի է ենթարկվել գրեթե 600 մարդ, որոնց այժմ ՄԻԱՎ-ի, В եւ С հեպատիտի թեստ անցնելու անվճար հնարավորություն է ընձեռվել: Առայժմ հայտնի չէ՝ նրանցից որեւէ մեկն արդյոք վարակվե՞լ է:

Տեղեկությունների համաձայն՝ ատամնաբուժական գործիքները բժիշկն ինքնուրույն է ձեռք բերել եւ դրանց ախտահանմամբ ինքն է զբաղվել: Ախտահանումը կատարել է Virex աղային լուծույթի միջոցով, սակայն դա չի համապատասխանում այն կլինիկայի սահմանած ստանդարտներին, որտեղ նա աշխատում էր. կլինիկայի կանոններով բժիշկները պետք է օգտագործել մեկանգամյա օգտագործման ստերիլ գործիքներ:

Այժմ բժիշկը, ում անունը չի հրապարակվում, հեռացվել է հիվանդների հետ աշխատելուց, սակայն շարունակում է կլինիկայում աշխատել ադմինիստրատիվ պաշտոնում:

Վերջերս համանման դեպք էր տեղի ունեցել Մասաչուսեթսի հիվանդանոցներից մեկում, որտեղ էնդոսկոպիական սարքավորման սխալ ստերիլացման հետեւանքով վարակման սպառնալիք էր ստեղծվել մոտ 300 հիվանդի համար, որոնց հիվանդանոցում կոլոսկոպիա էր կատարվել: Իսկ 2015-ի հոկտեմբերին 4 հիվանդ մահացել էր բակտերիալ ինֆեկցիայից, որն առաջացել էր բավարար չմանրէազերծված բժշկական գործիքների օգտագործմամբ վիրահատությունից հետո: Ինֆեկցիան հարուցել էին ոչ տուբերկուլյոզային միկրոբակտերիաները: Սովորաբար դրանք մահացու վտանգ չեն ներկայացնում, բայց որոշ դեպքերում, երբ ինվազիվային բժշկական միջամտությունների ընթացքում ընկնում են թուլացած օրգանիզմ, կարող են ծանր ինֆեկցիաներ հարուցել, որոնք մահացու ելքով են ավարտվում:

Հետևեք NEWS.am Medicine-ին Facebook-ում և Twitter-ում