Ոչ ինֆեկցիոն հիվանդությունների կանխարգելման սքրինինգային ծրագիրը, որը ֆինանսավորում է Համաշխահային բանկը, շոշափելի արդյունքներ է տալիս: Այս մասին լրագրողների հետ հանդիպման ժամանակ ասաց Առողջապահության նախարարության բժշկական օգնության քաղաքականության վարչության պետ Դավիթ Մելիք-Նուբարյանը:
Նրա խոսքով՝ վերջին 3 տարիներին սքրինինգի շնորհիվ հայտնաբերել են շաքարային դիաբետի մոտ 15 հազար նոր դեպք մարդկանց մոտ, որոնք չեն էլ կասկածել, որ հիվանդ են: Այս հիվանդության ժամանակին ախտորոշումը հնարավորություն է տալիս հիվանդությունը վերահսկողության տակ վերցնել՝ կանխելով դրա հետեւանքով հետագա բարդացումները (ինչպիսին են տեսողության կորուստը, չապաքինվող վերքերը եւ այլն):
Դավիթ Մելիք-Նուբարյանի խոսքով՝ սքրինինգային ծրագիրը նաեւ 15 տոկոսով մեծացրել է արգանդի վզիկի քաղցկեղի վաղ հայտնաբերումը: Հայաստանում մոտ 250 կին ամեն տարի մահանում է քաղցկեղի այս տեսակի հետեւանքով, սակայն եթե այն ժամանակին ախտորոշվի՝ դեռեւս նախաքաղցկեղի փուլում, այս կանայք բուժվելու շանս կստանան:
Ինչ վերաբերում է հիպերտոնիային, ապա սքրինինգային ծրագիրը քիչ է ազդել դրա հայտնաբերման վրա, սակայն դա, ըստ Դավիթ Մելիք-Նուբարյանի, վկայում է ոչ թե ծրագրի անարդյունավետության, այլ առաջնային օղակի լավ աշխատանքի մասին՝ ըստ երեւույթին, հիպերտոնիան առանց սքրինինգի էլ բավական արդյունավետ է հայտնաբերվում։
Հիշեցնենք, որ ոչ ինֆեկցիոն հիվանդությունների կանխարգելմանն ուղղված սքրինինգային ծրագիրը մեկնարկել է 2015 թվականի հունվարին, եւ այդ ժամանակից ի վեր իրականացվել է 1,5 մլն սքրինինգային հետազոտություն։
Ծրագիրը կշարունակվի հաջորդ երեք տարվա ընթացքում՝ համաձայն «Հիվանդությունների կանխարգելում եւ վերահսկում» ծրագրի համաձայնագրում կատարված փոփոխությունների, որն իրականացվում է Առողջապահության նախարարության կողմից Համաշխարհային բանկի աջակցությամբ։
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր