ԼԳԲՏ դեռահասները երկու անգամ ավելի հաճախ են ինքնասպանություն գործում հոգեկան տրավմայի պատճառով

Այն դեռահասները, որոնք համարվում են սեռական փոքրամասնություն, երկու անգամ ավելի հաճախ են ինքնասպանության փորձեր անում, քան իրենց հետերոսեքսուալ հասակակիցները: Նման եզրակացության են եկել Ջորջիայի համալսարանի գիտնականները, որոնց աշխատանքը հրապարակվել է Journal of Child & Adolescent Trauma ամսագրում։

Հետազոտողները վերլուծել են դեռահասների 14690 հարցաթերթիկներ 2015-2019 թվականներին: Յուրաքանչյուր հինգերորդ մասնակիցը հայտնել է, որ լրջորեն մտածել է ինքնասպանության մասին: Դպրոցականների 7 տոկոսից ավելին իրականում փորձել է ինքնասպանություն գործել, իսկ յուրաքանչյուր տասներորդ դեռահասը ենթարկվել է սեռական բռնության։

Պատասխանները վերլուծելիս եւ համեմատելիս հետազոտողները պարզել են, որ սեռական բռնության ենթարկվելը կապված է եղել ինքնասպանության մտքերի, ինքնասպանության պլանավորման եւ ինքնասպանության փորձերի հավանականության հետ:

Փոքրամասնությունների ներկայացուցիչները երկու անգամ ավելի հաճախ են ենթարկվում սեռական բռնության եւ տառապում հետտրավմատիկ սթրեսային խանգարումներից, քան նրանց հետերոսեքսուալ հասակակիցները: Սա նրանց ինքնասպանության հակումներ առաջացնելու ավելի մեծ ռիսկի է ենթարկում, ասում են գիտնականները:

«Մենք պետք է մտածենք, թե եւս քանի երեխա, ովքեր չեն մասնակցել այս հարցմանը, տրավմա են ապրել եւ ունեն ինքնասպանության մտքեր: Կարեւոր է նաեւ հաշվի առնել նրանց, ովքեր թաքցրել են իրենց ինքնասպանության հակումները՝ վախենալով, որ ինչ-որ մեկը կասի այդ մասին իրենց ծնողներին: Մեր ուսումնասիրությունն ընդգծում է բռնության եւ ինքնասպանությունների կանխարգելման ծրագրերի կարեւորությունը, հատկապես այն ծրագրերի, որոնք ուղղված են ԼԳԲՏ ներկայացուցիչներին»,- նշել են գիտնականները։

Հետևեք NEWS.am Medicine-ին Facebook-ում և Twitter-ում