Հայաստանում կարմրուկով վարակվածների շրջանում մինչեւ մեկ տարեկան երեխաներ կան, որոնք դեռեւս կանոնավոր պատվաստում ստանալ չեն կարող։ Այս մասին «Ազատություն» ռադիոկայանի «ֆեյսբուքյան ասուլիս»-ի ժամանակ հայտարարեց Առողջապահության փոխնախարար Լենա Նանուշյանը։
Կան նաեւ մեկ տարեկանից բարձր երեխաներ, որոնք ստացել են պատվաստանյութի մեկ չափաբաժին։ Ինչպես պարզաբանեց Նանուշյանը, մեկ չափաբաժինը ապահովում է բավարար իմունիտետ, սակայն անկայուն, իսկ պատվաստանյութի մեկ չափաբաժին ստացած երեխաները կարող են վարակվել, սակայն հիվանդության ընթացքը մեղմ է։
Նրա խոսքով, ստեղծված իրավիճակից ելնելով` սահմանվել են բնակչության թիրախային խմբեր, որոնք էլ պետք է պատվաստվեն առաջին հերթին։ 6 ամսականից բարձր երեխաները, ովքեր շփվել են վարակված մարդկանց հետ, կարող են ստանալ պատվաստանյութի մեկ չափաբաժին, սակայն ապագայում նրանք պետք է ստանան պատվաստանյութի եւս երկու դեղաչափ՝ 1 տարեկանում եւ 4-ից 6 տարեկանում:
Ինչ վերաբերում է նորածիններին, Լենա Նանուշյանի խոսքով, եթե մայրը պատվաստված է, ապա երեխաները հակամարմիններ են ստանում մոր կրծքի կաթից։ Եթե կրծքով կերակրող մայրերը չեն պատվաստվել, ապա նրանք կարող են դա անել հիմա եւ այդպիսով պաշտպանել նաեւ իրենց երեխաներին:
Ըստ փոխնախարարի՝ բացատրական աշխատանքներ են տարվում ծնողների հետ, ովքեր հրաժարվում են պատվաստել իրենց երեխաներին։
Առողջապահության նախկին նախարար Արսեն Թորոսյանի հարցին՝ արդյոք ժամանակը չէ՞ պատվաստումները պարտադիր դարձնելու, Լենա Նանուշյանը նշեց, որ անհրաժեշտ է վերլուծել պատվաստումների ընդգրկվածության իրավիճակը Հայաստանում, ինչպես նաեւ այն երկրներում, որտեղ պատվաստումը պարտադիր է, եւ որոշում կայացնել միայն այս վերլուծության հիման վրա:
«Արսեն Թորոսյանը Հայաստանի խորհրդարանի պատգամավոր է եւ կարող է հանդես գալ համապատասխան օրենսդրական նախաձեռնությամբ», - ասաց նա։
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր