• Latest news

Ուռուցքային հիվանդությունների բուժումը Հայաստանում. ի՞նչն է անվճար, իսկ ինչի՞ համար պետք է վճարել

4 փետրվարի, 2020  16:05

2019 թվականից Հայաստանում չարորակ նորագոյացությունների հեռացման վիրահատությունները, ինչպես նաեւ ճառագայթային թերապիան անցկացվում են անվճար: Ինչ վերաբերում է քիմիաթերապիային, բուն միջամտություններն անցկացվում են պետպատվերի շրջանակում (այն կլինիկաներում, որտեղ պետպատվեր կա), իսկ քիմիաթերապիայի դեղամիջոցների համար համավճար է հատկացվում: Այս մասին լրագրողներին ասաց Ֆանարջյանի անվան ազգային ուռուցքաբանական կենտրոնի ղեկավար Նարեկ Մանուկյանը:

Նրա խոսքով՝ 2018 թվականին իրենց կլինիկայում անցկացրել են չարորակ նորագոյացությունների հեռացման 1850 վիրահատություն, իսկ 2019-ին՝ 2562, շուրջ 35 տոկոսով ավելի: Եվ բանն ամենեւին հիվանդացության աճը չէ, այլ այն, որ անցյալում շատ պացիենտներ ուղղակի չեն վիրահատվել, քանի որ փող չունեին, իսկ հիմա վիրահատությունները կատարվում են պետպատվերի շրջանակում:

Ճառագայթային թերապիա ստացող պացիենտների թիվը նույնպես աճել է՝ նույն պատճառով:

Նարեկ Մանուկյանը նաեւ նշեց, որ մասնավոր կլինիկաներում, որտեղ պետպատվեր չկա, քիմիաթերապիայի կարիք ունեցողները ստիպված են վճարել ե՛ւ միջամտության, ե՛ւ դեղերի համար: Իսկ այն կլինիկաներում, որտեղ պետպատվեր կա, մասնագետների ծառայությունների համար չպետք է վճարել: Ինչ վերաբերում է դեղամիջոցներ ձեռք բերելուն, ապա հաշմանդամության հիմքով հատուկ խմբերի մեջ մտած մարդկանց պետությունը 60 հազար դրամի համավճար է հատկացնում, իսկ մնացյալ բոլորին՝ 30 հազար դրամի: Եթե դեղամիջոցն ավելի թանկ արժե, գումարը պետք է լրացնի ինքը՝ պացիենտը:

Պետության ներդրած համավճարի չափն, իհարկե, մեծ չէ, հատկապես եթե հաշվի առնենք, որ որոշ դեղամիջոցներ հազարավոր դոլար արժեն: Սակայն այս գումարը բավարարում է առաջին գծի որոշ դեղամիջոցների ձեռքբերմանը, նշեց Նարեկ Մանուկյանը:

Առողջապահության նախարարության ուռուցքաբանության հարցերով խորհրդական, քիմիաթերապեւտ Հայկուհի Գյոկչյանն իր հերթին նշեց, որ ուռուցքաբանությունն ամբողջ աշխարհում համարվում է բժշկության ամենաթանկարժեք ուղղություններից մեկը, եւ անգամ զարգացած երկրներն իրենց չեն կարող թույլ տալ պետական բյուջեից վճարել քիմիաթերապիայի բոլոր դեղամիջոցների համար:

«Ամեն տարի նոր դեղամիջոցներ են հայտնվում, որոշներն արժեն հազարավոր եվրո, եւ նույնիսկ զարգացած երկրներում դրանք չեն կարող պետական բյուջեից գնել: Այս պատճառով հիմնադրամներ կան, բարեգործական կազմակերպություններ, որոնք պացիենտներին օգնում են այդ դեղերը ձեռք բերել», - ասաց մասնագետը:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է