Ալկոհոլի հետ խնդիրնե՞ր ունեք. Գենային 29 տարբերակները կարող են բացատրել՝ ինչու

Ավելի քան 435 000 մարդու գենոմային անալիզով հայտնաբերվել են 29 գենետիկ տարբերակներ՝ կապված ալկոհոլի գործածման խնդիրների հետ, հայտնել են Յելի համալսարանի Բժշկական ֆակուլտետի հետազոտողները:

Հետազոտությունը ներառում է եվրոպական ծագման մարդկանց գենոմի անալիզը, որ պարունակվում է 4 առանձին բիոբանկերում կամ տվյալների հավաքակազմում: Հետազոտողները փորձել են ընդհանուր գենետիկ տարբերակներ գտնել նրանց շրջանում, ովքեր համապատասխանել են ալկոհոլի խնդրահարույց գործածման չափանիշներին, ներառյալ ալկոհոլամոլությունը եւ բժշկական հետեւանքներ ունեցող ալկոհոլի գործածումը: Այս խանգարումներն ամբողջ աշխարհում բազմաթիվ բժշկական խնդիրների հիմնական պատճառներն են:

Անալիզը հայտնաբերել է ալկոհոլի խնդրահարույց գործածման ռիսկի նախկինում անհայտ 19 անկախ գենետիկ գործոններ եւ հաստատել ռիսկի նախկինում հայտնաբերված 10 գործոններ, հայտնում է Medicalxpress-ը:

Բիոբանկի տվյալների մեթավերլուծությունը տեղեկություններ է ներառել նաեւ մի շարք հոգեկան խանգարումների ռիսկի գենետիկ գործոնների մասին: Այդ տեղեկությունները հետազոտողներին թույլ են տվել ուսումնասիրել ընդհանուր գենետիկ կապերը ալկոհոլի գործածման խնդիրների եւ այնպիսի խանգարումների միջեւ, ինչպիսին են դեպրեսիան եւ տագնապայնությունը:

Նրանք նաեւ հայտնաբերել են, որ այս տարբերակների գենետիկ ժառանգականությունը հարստացված էր ուղեղում եւ գենոմի էվոլյուցիոն կոնսերվատիվ կարգավորող հատվածներում, ինչը վկայում է կենսաբանական ֆունկցիայի համար դրանց նշանակության մասին: Օգտագործելով Մենդելեեւյան ռանդոմիզացիա կոչվող տեխնոլոգիան՝ նրանք կարողացել են ուսումնասիրել, թե ինչպես է մեկ գենետիկորեն ազդող նշանն ազդում մյուս գենետիկորեն կապված նշանի վրա:

«Սա մեզ հնարավորություն է տալիս հասկանալ ալկոհոլի գործածման խնդրահարույց առանձնահատկությունների միջեւ պատճառահետեւանքային կապերը, ինչպիսին են հոգեբուժական վիճակները, ռիսկային պահվածքը եւ մտավոր ունակությունները»,- նշել է Յելի համալսարանի հոգեբուժության ոլորտի գիտաշխատակից եւ հետազոտության առաջատար հեղինակ Հանգ Չժոուն:

«Այս արդյունքների շնորհիվ մենք կարող ենք անհատական մակարդակում նաեւ ավելի լավ գնահատել ռիսկը ալկոհոլի խնդրահարույց գործածման համար»,- ասել է Գելերնթերը:

Հետևեք NEWS.am Medicine-ին Facebook-ում և Twitter-ում