Գիտնականները վիրուսային հիվանդությունների գլխավոր փոխանցող են համարում չղջիկներին

Ամերիկյան EcoHealth Alliance կազմակերպության հետազոտողները կազմել են «սպառնալիքների համաշխարհային քարտեզ»` քարտեզի վրա նշելով այն տարածքները, որոնք կարող են մարդկության առողջությանը սպառնացող վիրուսային համաճարակի աղբյուր լինել, հայտնում է BBC-ն: Գիտնականներն ուսումնասիրել են տարբեր տարածքների կաթնասուններին, ինֆեկցիոն հիվանդությունները, որոնք այս կենդանիներն են փոխանցում, եւ մարդու հետ նրանց շփումների հնարավորությունը:

Նրանք, մասնավորապես, հետազոտել են վիրուսների 586 տեսակներ, որոնցով վարակված են եղել կաթնասունների 754 տեսակներ (վիրուսների 188 տեսակները համարվում են կենդանիների միջոցով փոխանցվող ինֆեկցիաներ, որոնք կարող են վարակել մարդուն), ըստ որում` հատուկ ուշադրություն է դարձվել այն վիրուսներին, որոնք մինչեւ վերջերս հետազոտողները, փաստորեն, անտեսում էին: Մասնագետներն իրենց հետազոտության արդյունքներով  կազմել են վայրի կենդանիների բնակության տարածքների քարտեզը` ինֆեկցիոն հիվանդությունների տարածման հետ միասին, որոնք նրանք կրում են: Պարզվել է, որ համաճարակների հնարավոր բռնկման պոտենցիալ վայրերը կաթնասունների տարբեր խմբերի համար տարբերվում են, սակայն չղջիկներից բխող սպառնալիքը մեծապես գերազանցում է կենդանիների մնացած տեսակների վտանգին: Մասնավորապես` ըստ ամենայնի, չղջիկներն են դարձել վերջին տարիների ամենածանր համաճարակներից մեկի` Էբոլա տենդի բռնկման պատճառը:

Հետազոտողները նշել են կենդանիների կողմից փոխանցվող 17 ինֆեկցիաներ, որոնք կարող է կրել այս խմբի ցանկացած ներկայացուցիչ, ըստ որում` չղջիկների առաջացրած համաճարակները կարող են բռնկվել աշխարհի ցանկացած կետում, սակայն առավել մեծ վտանգ է առկա Հարավային Ամերիկայում: Դրանից բացի, գիտնականները 10 ինֆեկցիայի մասին են հայտնել, որոնք փոխանցվում են կապիկների եւ կրծողների ցանկացած տեսակի միջոցով:

Հետազոտության հեղինակները հայտարարել են, որ ընդհանրապես ցանկացած համաճարակ առաջանում է շրջակա միջավայրի վրա մարդու ներգործության հետեւանքով, ուստի նոր համաճարակի հայտնվելու  վտանգը նվազագույնի հասցնելու համար անհրաժեշտ է մարդու շփումները վայրի բնության հետ առավելագույն չափով սահմանափակել, մասնավորապես` դադարեցնել որսորդությունը եւ վայրի կենդանիների բնակության սովորական վայրերի ավերումը:

Հետևեք NEWS.am Medicine-ին Facebook-ում և Twitter-ում