Քլիվլենդի կլինիկայի մասնագետը Երեւանում մանկաբուժական անեսթեզիոլոգիայի մասին դասախոսություններ է կարդացել

Քլիվլենդի կլինիկայի մանկաբուժական անեսթեզիոլոգիայի բաժանմունքի վարիչ Սթիվեն Քիմաթյանը (Stephen Kimatian) այսօր, հուլիսի 9-ին, «Արաբկիր» բժշկական կենտրոնում մանկաբուժական անեսթեզիոլոգիայի մասին դասախոսություններ է կարդացել։

«Այսօր 3 դասախոսություն է եղել, որոնց ընթացքում մենք խոսել ենք մանկաբուժական պացիենտների խնամքի առաձնահատկությունների մասին», - NEWS.am Medicine-ի թղթակցին պատմել է Սթիվեն Քիմաթյանը։

Առաջին դասախոսությունը կոչվում է «Difficult airway management» եւ նվիրված է նչուղիների կառավարմանը եւ հնարավոր դժվարություններին։ Երկրորդ դասախոսությունը՝ «Anesthesia and congenital heart disease», Սթիվեն Քիմաթյանի խոսքով, նվիրված է մանկաբուժական պացիենտների սրտային հիվանդություններին եւ դրանց առկայության դեպքում անզգայացման առանձնահատկություններին։ «Սա շատ կարեւոր է, քանի որ սրտային հիվանդությունների բուժումը նկատելիորեն զարգացել է վերջին տարիների ընթացքում, եւ սրտային հիվանդություններով տառապող շատ եւ շատ երեխաներ ողջ են մնում, մեծանում են եւ մեծահասակներ են դառնում։ Այսպիսով, մենք պետք է սովորենք, թե ինչպես է պետք այդպիսի պացիենտներին խնամել», - ասել է բժիշկը։

Դասախոսությունների ընթացքում քննարկվել է նաեւ երեխաների վիրահատությունների ժամանակ տեղային անզգայացման կիրառումը, որի շնորհիվ կարելի է անզգայացնել մարմնի միայն որոշ հատվածը, այլ ոչ ամբողջ մարմինը։ Դա շատ կարեւոր է հատկապես երեխաների վիրահատությունների ժամանակ, քանի որ հարկ չի լինում օգտագործել այլ, ավելի ուժեղ դեղամիջոցներ, որոնք մի շարք անցանկալի կողմնակի ազդեցություններ կարող են ունենալ։

Նախքան դասախոսություն կարդալը՝ երկուշաբթի օրը, հուլիսի 7-ին, Սթիվեն Քիմաթյանը այցելել էր բժշկական կենտրոնի վիրահատարանը։ «Մեծ մասամբ ես հետեւում էի վիրահատություններին, նաեւ ցուցադրեցի անեսթեզիոլոգիայում կիրառվող մի տեխնիկա», - NEWS.am Medicine-ի թղթակցին ասել է բժիշկը։

Հետևեք NEWS.am Medicine-ին Facebook-ում և Twitter-ում