Ամերիկացի գիտնականներն ատամների կյանքը երկարացնելու միջոց են գտել

Ամերիկացի գիտնականները հավաստում են, որ նոր պոլիմերային նյութի շնորհիվ կարող են երկարացնել ատամների կյանքը: Աշխատանքի արդյունքները ներկայացվել են Բոստոնում Ամերիկյան քիմիական ընկերակցության ամենամյա համաժողովի ընթացքում:

Նյու Ջերսիի Տեխնոլոգիական ինստիտուտից Վիվեկ Կումարի խոսքով՝ նորագույն հիդրոգելը երկու գործառույթ է կատարում. մանրէներին թույլ չի տալիս բազմանալ եւ ատամի վնասված հյուսվածքներին ստիպում է ինքնավերականգնվել: Այս նյութը սպիտակուցներ է պարունակում, որոնք խթանում են ատամնահյուսվածքի եւ անոթների աճը, ինչպես նաեւ հակաբիոտիկների մոլեկուլներ, որոնք խանգարում են հիդրոգելի քայքայմանը:

Կրծողների վրա արված փորձերը ցույց են տվել, որ հիդրոգելը ոչ միայն պաշտպանում է ատամի նյարդը մահանալուց, այլեւ դենտինին ստիպում է վերականգնել ատամի վնասված հանքային հատվածները: Ներկայում հիդրոգելը փորձարկվում է շների վրա. այն պետք է բուժի կենդանիների՝ նյարդերը հեռացրած ատամները: Փորձի հաջող ավարտի դեպքում մասնագետները ծրագրում են կամավորների մասնակցությամբ կլինիկական փորձ անցկացնել:

Հետևեք NEWS.am Medicine-ին Facebook-ում և Twitter-ում