Բուժաշխատողները, գրանցվելով ռեեստրում, հունվարի 1-ից կարող են առցանց կազմակերպել մասնագիտական գործունեության սերտիֆիկատ ստանալու գործընթացը։ Բուժաշխատողը գործ չի ունենա թղթե փաստաթղթերի հետ, փոխարենը կկարողանա էլեկտրոնային եղանակով համակարգ մուտքագրել բոլոր անհրաժեշտ տվյալները և իր դիմումը։ Այս մասին նոյեմբերի 22-ին լրագրողների հետ զրույցում ասել է «Էլեկտրոնային առողջապահության ազգային օպերատոր» ՓԲԸ տնօրեն Ավետ Մանուկյանը։
«Առողջապահության ազգային ինստիտուտը տեսնում է դա և հաստատում առկա տվյալները, իսկ համակարգը օգնում է բուժաշխատողին հավաքել անհրաժեշտ կրեդիտները, ինչի հիման վրա էլ տրվում է սերտիֆիկատը։ Համակարգը կունենա նաև այլ հնարավորություններ։
Համակարգը լիովին պատրաստ է աշխատանքի, իսկ հայտնաբերված բոլոր բացթողումներն արագ վերացվում են: Ներկայումս աշխատանքներ են տարվում բուժաշխատողներին առցանց գրանցման գործընթացի մասին իրազեկելու ուղղությամբ»,- նշել է նա։
Մանուկյանը բացատրել է, որ սա նման է «Linkedin» համակարգին։
«Շատերն իրենց մասնագիտական պատմությունը էլեկտրոնային եղանակով պահում են «Linkedin»-ում, և եթե ինչ-որ մեկը ցանկանում է ծանոթանալ դրան, ապա բժիշկը հղում է ուղարկում այն պատմությանը, որը պահվում է «Linkedin»-ում: Նույն գաղափարը կներդրվի նաև բուժաշխատողների ռեեստրում։ Բժիշկը կունենա էլեկտրոնային փոստի հասցե՝ եզակի QR կոդով, որով տեսանելի կլինի, թե կոնկրետ բժշկի համար որ փուլում է գտնվում սերտիֆիկացման գործընթացը»,- ընդգծել է նա։
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր