Այսուհետ շտապօգնության կանչի թերթիկները կլրացվեն էլեկտրոնային եղանակով. բջջային նոր հավելվածով

Այսուհետ շտապ և անհետաձգելի բժշկական օգնության կանչի թերթիկները կլրացվեն էլեկտրոնային եղանակով. բջջային նոր հավելվածը հնարավորություն կտա ներբեռնել բուժառուի տվյալները մեկ ընդհանուր համակարգում։ Այդ մասին, այսօր՝ մարտի 4-ին, Երևանի քաղաքապետարանի գործակարգավարական խորհրդակցությանն ասաց առողջապահության վարչության պետի պաշտոնակատար Դավիթ Կարապետյանը:

Շտապօգնության բժիշկների մոտ առկա կլինեն պլանշետներ, որտեղ կգրանցվի կանչի ստացման պահից սկսած յուրաքանչյուր քայլ՝ կանչի ժամը, հիվանդի ներկայացրած գանգատները, ախտորոշումը, իրականացված միջամտությունները, դեղերի ցանկը, հիվանդանոց տեղափոխման ընթացքը և այլն:

«Ստանալով կանչը՝ առայժմ դիսպետչերների միջոցով փոխանցվում է պլանշետի վրա: Իհարկե, հաջորդիվ ունենալու ենք միանգամից փոխանցում: Գանգատները անմիջապես նշվելու են, կա նաև ձայնային մուտքի հնարավորություն, կա նաև էլեկտրասրտագրությունը նկարելու հնարավորություն:

Բոլոր ախտորոշումները, որոնք համաշխարհային միջազգային բժշկական դասակարգավորման մեջ կան, ներառված են, և շատ հեշտ և գրագետ ձևով կարող են ներմուծել»,- ասաց Դավիթ Կարապետյանը:

Բացի կանչի ընթացքի արձանագրումից՝ վճարովի ծառայության դեպքում պլանշետներով հնարավոր կլինի նաև քարտից գումար գանձել:

Հետևեք NEWS.am Medicine-ին Facebook-ում և Twitter-ում