Կանանց մոտ սրտանոթային հիվանդությունների վտանգը կտրուկ աճում է դաշտանադադարից հետո - ուսումնասիրություն

Նոր հետազոտությունը կարող է օգնել բացատրել այն բարդ պատճառները, թե ինչու է սրտանոթային հիվանդությունների վտանգը կտրուկ աճում դաշտանադադարից հետո: Այժմ ապացույցներ կան, որ էստրոգենի մակարդակի նվազման դեպքում կանանց շրջանում ռիսկն ավելի արագ է աճում, քան նույն տարիքի տղամարդկանց մոտ: Գիտնականները պարզել են, որ հետդաշտանադադարում գտնվող կանանց մոտ զարկերակների պատերին ճարպային կուտակումները միջինը երկու անգամ ավելի արագ են ավելանում, քան համանման ժողովրդագրական տվյալներով և բժշկական կարգավիճակ ունեցող տղամարդկանց մոտ, ասվում է Սրտաբանների ամերիկյան քոլեջի համաժողովում ներկայացված և հետդաշտանադադարում գտնվող 579  կանանց հետազոտության վրա հիմնված ուսումնասիրության մեջ, գրում է Medical Xpress-ը։ 

Բժիշկներին վաղուց հայտնի է, որ էստրոգենը, ըստ երևույթին, ապահովում է սրտանոթային հիվանդություններից պաշտպանությունը: Սակայն դժվար է հստակեցնել, թե ինչպես է դաշտանադադարը փոխազդում ռիսկի այլ գործոնների հետ, ինչպիսիք են գենետիկան և ապրելակերպը, մասամբ այն պատճառով, որ դրա սկիզբը և տևողությունը շատ տարբեր են կանանց մոտ:

«Այս վերջին ուսումնասիրությունը ցույց է տվել, որ մենք ունենք որոշ կանխարգելիչ թեստեր, որոնք կարող ենք անցկացնել, որպեսզի հետազոտենք ցածր ռիսկի կանանց, ասենք 40-ից 70 տարեկան, և հասկանանք, թե արդյո՞ք նրանք պետք է որևէ այլ բան ձեռնարկեն»,- նշել է բժիշկ Կրիշնանը: Ըստ նրա, սա շատ բարդ գործընթաց է, քանի որ հայտնի է, որ էստրոգենն ազդում է շատ բաների վրա։

Ըստ Կրիշնանի, շատ կանայք կարծում են, որ ակնհայտ լուծումը կլինի էստրոգենի ընդունումը, բայց դա այդպես միանշանակ չէ: Կախված կնոջ բժշկական պատմությունից՝ էստրոգենի ընդունումը կարող է մեծացնել բորբոքումը, թրոմբեր առաջացնել կամ նույնիսկ նպաստել քաղցկեղի զարգացմանը:

Սրտաբանի վկայությամբ, սրտի նոպայի ժամանակ կանանց ախտանշաններն ավելի հաճախ ներառում են գլխապտույտ, հոգնածություն և սրտխառնոց, սակայն կանայք նաև հաճախ կրծքավանդակի ցավը վերագրում են ստամոքսի խանգարմանը կամ գերլարվածությանը:

Գրեթե յուրաքանչյուր կին, որ սրտի նոպա է ունեցել, ասում է, որ չի գիտակցել, որ դա է տեղի ունենում: Շատերն ասել են, որ իրենց պարզապես թվացել է, որ իրենց կրծկալը չափազանց նեղ է եղել: Բայց եթե կանայք իրենց կրծքավանդակում ճնշում կամ ծանրություն են զգում սովորական գործունեության ընթացքում, ինչպիսիք են տունը մաքրելը, գնած մթերքը տուն հասցնելը կամ մահճակալը հավաքելը, դա կարող է անհանգստության պատճառ լինել, ասել է սրտաբանը։

Սա չի նշանակում, որ պետք է խուսափել ֆիզիկական ծանրաբեռնվածությունից: Կանոնավոր ֆիզիկական վարժությունները սրտային հիվանդություններից պաշտպանվելու լավագույն միջոցներից են, ընդգծել է սրտաբանը՝ հավելելով, որ կենդանիների մոդելների վրա ցույց է տրվել, որ աերոբիկ մարզումները մեղմացնում են  էստրոգենի կորստի հետևանքները:

Հետևեք NEWS.am Medicine-ին Facebook-ում և Twitter-ում