Տեխասի համալսարանի (Գալվեստոն) բժշկական կամպուսի գիտնականները հայտնաբերել են, որ նիհարելու համար նախատեսված սեմագլուտիդ դեղամիջոցը բարձրացնում է դիաբետ չունեցող տղամարդկանց էրեկտիլ դիսֆունկցիայի հավանականությունը։ Հետազոտության արդյունքները հրապարակվել են IJIR: Your Sexual Medicine Journal-ում։
Հետազոտությանը մասնակցել են 18-50 տարեկան տղամարդիկ, որոնք հաստատված ճարպակալում, մարմնի զանգվածի 30-ը գերազանցող բարձր ինդեքս են ունեցել։ Նշվել է, որ այդ մարդիկ դիաբետ չեն ունեցել։ Գիտնականները փորձել են պարզել, թե ինչ ազդեցություն է ունենում սեռական ֆունկցիայի վրա սեմագլուտիդի ընդունումը։ Դեղն օգնում է վերահսկել քաղցի զգացողությունը հորմոնի գործողության նմանակման միջոցով, որն արտադրվում է օրգանիզմի կողմից, երբ ուտելիքը հայտնվում է ստամոքսում։
Գիտնականները հայտնաբերել են, որ հետազոտության մասնակիցների 1,47 տոկոսի մոտ, որոնց նշանակել են սեմագլուտիդ, ախտորոշվել է էրեկտիլ դիսֆունկցիա։ Վերահսկիչ խմբի կամավորների մեջ (որոնք սեմագլուտիդ չեն ընդունել) էրեկտիլ դիսֆունկցիայի տարածվածությունը կազմել է 0,32 տոկոս։ Նաեւ պարզվել է, որ 1,53 տոկոս դեպքերում սեմագլուտիդի նշանակումից հետո տղամարդկանց մոտ ախտորոշվել է տեստոստերոնի (արական սեռական հորմոն) դեֆիցիտ։ Վերահսկիչ խմբում այդ ցուցանիշը կազմել է 0,80 տոկոս։
Հետազոտողները ենթադրել են, որ էրեկտիլ դիսֆունկցիան կարող է առաջանալ դեղամիջոցի՝ հարթ մկանները թուլացնելու հատկությամբ։ Դա սպեցիֆիկ, անշերտ մկանային հյուսվածք է, որը հիմնականում հանդիպում է սեռական օրգանների պատերին եւ արյունատար անոթներում (այդ թվում անոթային ապարատում, որը պատասխանատու է էրեկցիայի համար)։
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր