Դաջվածքները մեծացնում են լիմֆոմայի վտանգը. հետազոտություն

Նոր հետազոտությունը ցույց է տվել, որ դաջվածքների առկայությունը կարող է լուրջ սպառնալիք դառնալ առողջության համար: Այս առումով հետազոտությունների բացակայության պատճառով Շվեդիայի Լունդի համալսարանում որոշել են ուսումնասիրել դաջվածքների երկարաժամկետ ազդեցությունն առողջության վրա։

Հետազոտությունը ղեկավարած Քրիստել Նիլսենը պատմել է, որ թիմն ուսումնասիրել է 11 հազար 905 հոգուց բաղկացած մի մեծ խումբ՝ դաջվածքների և լիմֆոմայի միջև կապի մասին ավելին պարզելու նպատակով: Լիմֆոման արյան քաղցկեղի տարատեսակ է։ Այս «հազվադեպ» քաղցկեղն արյան սպիտակ բջիջներից տարածվում է օրգանների ցանցի մեջ, որոնք օրգանիզմին օգնում են պայքարել վարակների դեմ:

«Բնակչության գրանցամատյանների միջոցով գտանք լիմֆոմա ախտորոշված ​​մարդկանց», - պատմում է Նիլսենը: «Հետազոտության մասնակիցները պատասխանեցին ապրելակերպի գործոններին վերաբերող հարցաշարին, որպեսզի կարողանանք որոշել՝ արդյոք նրանք դաջվածքներ ունեին, թե ոչ»: 11 հազար 905 մարդկանցից 2938-ի օրգանիզմում 20- 60 տարեկան հասակում լիմֆոմա է ախտորոշվել:

Լիմֆոմա ունեցող խմբում դաջվածք է ունեցել 21 տոկոսը (289 մարդ), մինչդեռ առանց լիմֆոմա ախտորոշման վերահսկիչ խմբում դաջվածք է ունեցել 18 տոկոսը (735 մարդ): Գիտնականները եկել են այն եզրակացության, որ դաջվածքի չափը կարող է մեծացնել լիմֆոմայի առաջացման վտանգը, և որ կարևոր չէ, թե մարմնի կոնկրետ որ հատվածի վրա է դաջվածքը։

Հետևեք NEWS.am Medicine-ին Facebook-ում և Twitter-ում